சென்னை: சென்னை பல்கலைக்கழகத்தில் தத்துவவியல் துறை தலைவராக பணியாற்றிய வெங்கடாசலபதி 2025 ஜனவரி மாதம் பணி ஓய்வுபெற்றார். கல்வியாண்டு முடிவடையும் ஜூன் 30ம் தேதி வரை பணியாற்ற அவருக்கு அனுமதி அளிக்கப்பட்டது. இதையடுத்து, துறைக்கு புதிய தலைவர் நியமிக்கப்படும் வரை பணி நீட்டிப்பு வழங்கக்கோரி விண்ணப்பம் அளித்தார். அந்த விண்ணப்பம் பரிசீலிக்கப்படாததால் அவர் சென்னை உயர் நீதிமன்றத்தில் வழக்கு தொடர்ந்தார். வழக்கை விசாரித்த உயர் நீதிமன்றம், வெங்கடாசலபதியின் கோரிக்கை மனுவை பரிசீலிக்குமாறு பல்கலைக்கழகத்திற்கு உத்தரவிட்டது. இந்நிலையில், கல்வியாண்டு முடிவடைவதற்கு ஒரு மாதம் முன்பே அவரது பதவிக்காலத்தை குறைத்து பல்கலைக்கழகம் உத்தரவிட்டது. இதை எதிர்த்து அவர் தொடர்ந்த வழக்கை தனி நீதிபதி தள்ளுபடி செய்தார்.
இதையடுத்து, அவர் மேல்முறையீடு செய்தார். இதனை விசாரித்த நீதிபதிகள் ஆர்.சுப்பிரமணியன் மற்றும் கே.சுரேந்தர் அடங்கிய அமர்வு, பல்கலைக்கழக சட்டப்படி கல்வியாண்டு ஜூன் மாதம் தான் முடிவடைகிறது. எனவே, வெங்கடாசலபதியின் மறு நியமன காலத்தை ஒரு மாதம் குறைத்து பிறப்பித்த உத்தரவு ரத்து செய்யப்படுகிறது. அவருக்கு ஒரு மாத ஊதியத்தை வழங்க வேண்டும் என்று உத்தரவிட்டது.
