யாருக்கு எவ்வளவு; எச்-1பி விசா கட்டணம்..? அமெரிக்கா புது அறிவிப்பு

நியூயார்க்: எச்-1பி புதிய விசா கட்டணமாக 1 லட்சம் டாலர் (ரூ.88 லட்சம்) என அமெரிக்க அரசு கடந்த மாதம் அறிவித்தது. இந்த விசாவில் செல்பவர்களில் பெரும்பாலானோர் இந்தியர்கள் என்பதால் இது இந்தியர்கள் மத்தியில் கடும் அதிர்ச்சியை ஏற்படுத்தியது.

இந்த நிலையில், இந்த பணியாளர்களுக்கு நிம்மதி அளிக்கும் வகையில், அமெரிக்க குடியுரிமை மற்றும் குடிவரவு சேவைகள் அமைப்பு அறிவிப்பு ஒன்றை வெளியிட்டுள்ளது. தற்போது அமெரிக்காவில் மாணவர் விசாவில் இருக்கும் நபர்கள், எச்-1பி விசாவிற்கு அப்கிரேட் ஆனாலும், அவர்களும் 1 லட்சம் டாலர் கட்ட வேண்டியதில்லை. ஆனால், இந்த இரண்டு நடைமுறைகளுக்கு இடையிலும் அவர்கள் அமெரிக்காவை விட்டு வெளியேறி இருக்கக்கூடாது. அமெரிக்காவில் வசிக்கும் நபர்கள் எச்-1 பி விசாவிற்கு புதுப்பிக்க மற்றும் நீட்டிக்கவும் கட்டணம் செலுத்த வேண்டியதில்லை. இருப்பினும், ஒரு நபர் நிலை மாற்றம் அல்லது தங்கும் கால நீட்டிப்புக்கு தகுதியற்றவர் எனக் கண்டறியப்பட்டால், புதிய கட்டணம் பொருந்தும்.

செப்டம்பர் 21ம் தேதி முன்பு வரை எச்-1 பி விசாவுக்கு விண்ணப்பித்தவர்களுக்கு கட்டண உயர்வு பொருந்தாது என்றும் புதிய கட்டணம் அறிவிக்கப்பட்ட பின் விண்ணப்பித்தவர்களுக்கு பொருந்தும். புதிதாக எச்-1பி விசா பெற்று அமெரிக்கா வருபவர்களும், எச்-1பி விசா காலக்கெடு முடிந்து மீண்டும் விண்ணப்பிப்பவர்களும் 1 லட்சம் டாலர் கட்ட வேண்டும். இப்போது செல்லுபடி ஆகும் எச்-1பி விசா வைத்திருப்பவர்கள் அமெரிக்காவில் இருந்து வெளியே செல்வதற்கும், மீண்டும் அமெரிக்கா திரும்புவதற்கு எந்தக் கட்டுப்பாடும் இல்லை என தெரிவிக்கப்பட்டுள்ளது.