கிராண்ட் செஸ் டூர் 6ம் இடத்தில் குகேஷ்: தொடர் தோல்விகளால் தடுமாற்றம்
செயின்ட் லூயிஸ்: அமெரிக்காவில் நடந்து வரும் கிராண்ட் செஸ் டூர் போட்டிகளில் உலக சாம்பியன் குகேஷ் பிளிட்ஸ் செஸ் பிரிவில் மோசமான தோல்விகளால் 6வது இடத்துக்கு தள்ளப்பட்டுள்ளார். அமெரிக்காவின் செயின்ட் லூயிஸ் நகரில் கிராண்ட் செஸ் டூர் போட்டிகள், ரேபிட் மற்றும் பிளிட்ஸ் என இரு பிரிவுகளாக நடத்தப்பட்டு வருகின்றன. 10 வீரர்கள் பங்கேற்கும் இப்போட்டிகளின் ரேபிட் பிரிவில் குகேஷ் 10 புள்ளிகள் பெற்றிருந்தார்.
அதைத் தொடர்ந்து நடந்த பிளிட்ஸ் பிரிவு போட்டிகளில் குகேஷ் 4 தொடர் தோல்விகளை சந்தித்தார். மேலும் 4 போட்டிகளில் டிரா செய்த அவர், ஒரு போட்டியில் மட்டும் அமெரிக்க வீரர் லெய்னியர் டோமின்கெஸை வென்றார். பிளிட்ஸ் போட்டிகளில் 3 புளளிகளை மட்டுமே பெற்ற குகேஷ் ஒட்டு மொத்தமாக 13 புள்ளிகளை மட்டுமே பெற்றார். அதனால், புள்ளிப் பட்டியலில், குகேஷ் 6ம் இடத்துக்கு தள்ளப்பட்டார்.
இப்பட்டியலில் அமெரிக்க கிராண்ட் மாஸ்டர் லெவோன் ஆரோனியன் 19 புள்ளிகளுடன் முதலிடத்தில் உள்ளார். மற்றொரு அமெரிக்க கிராண்ட் மாஸ்டர் பேபியானோ கரவுனா 17 புள்ளிகளுடன் 2ம் இடத்தை பிடித்தார். பிரான்ஸ் கிராண்ட் மாஸ்டர் மேக்ஸிமே வஷியர் லாக்ரே 16.5 புள்ளிகளுடன் 3ம் இடத்தில் உள்ளார். பிலிப்பைன்ஸ் அமெரிக்க வீரர் வெஸ்லி ஸோ, உஸ்பெகிஸ்தான் வீரர் நோடிர்பெக் அப்துஸட்டோரோ தலா 15 புள்ளிகளுடன் 4 மற்றும் 5வது இடங்களில் உள்ளனர்.