5 மாதத்தில் நீதி பெற்றுத்தந்த அரசு வழக்கறிஞர்கள் காவல்துறைக்கு முதல்வர் நன்றி

சென்னை: மாணவிக்கு இழைக்கப்பட்ட அநீதிக்கு எதிராக 5 மாதத்தில் நீதியை பெற்றுத் தந்த காவல் துறை, அரசு வழக்கறிஞர்களுக்கு முதல்வர் நன்றி தெரிவித்துள்ளார். முதல்வர் மு.க.ஸ்டாலின் நேற்று சமூக வலைதள பதிவில் வெளியிட்டுள்ள செய்தி: சென்னை மாணவிக்கு இழைக்கப்பட்ட அநீதிக்கு எதிராக வழக்கை துரிதமாக நடத்தி, ஐந்தே மாதத்தில் நீதியை பெற்றுத் தந்துள்ளது நமது காவல்துறை. விசாரணை அதிகாரிகளுக்கும் அரசு வழக்கறிஞர்களுக்கும் மாண்பமை நீதிமன்றத்துக்கும் நன்றி.

காவல்துறையினரிடம் நான் தொடர்ந்து கூறுவது: “குற்றம் நடக்கக் கூடாது; நடந்தால் எந்த குற்றவாளியும் தப்பக் கூடாது; விசாரணையைத் துரிதமாக நடத்தி, தண்டனை பெற்றுத் தர வேண்டும்!”. குற்றங்களின் கூடாரமாக அன்று அரசை நடத்தி, இன்று அவதூறுகளை அள்ளித் தெளித்து, மலிவான அரசியல் செய்யத் துடித்த எதிர்க்கட்சியினரின் எண்ணத்தைத் தவிடுபொடியாக்கி உள்ளோம். சட்டநீதியையும் - பெண்கள் பாதுகாப்பையும் எந்நாளும் உறுதிசெய்வோம்! இவ்வாறு அவர் கூறியுள்ளார்.