தங்கம் விலை ஜெட் வேகத்தில் அதிகரிப்பு; கிராம் ரூ.10 ஆயிரத்தை கடந்து வரலாற்றில் புதிய உச்சம்: திருமணம், பண்டிகை நாட்களில் தொடர் விலை உயர்வால் நகை வாங்குவோர் கடும் அதிர்ச்சி

சென்னை: தங்கம் விலை நேற்று ெஜட் வேகத்தில் அதிகரித்து ஒரு கிராம் ரூ.10 ஆயிரத்தை கடந்து வரலாற்றில் புதிய உச்சம் கண்டது. திருமணம் மற்றும் நவராத்திரி, தீபாவளி பண்டிகை நேரத்தில் தொடர் விலை உயர்வால் நகை வாங்குவோர் அதிர்ச்சியடைந்துள்ளனர். தங்கம் விலை கடந்த மாதத்தில் அதிரடியாக உயர்ந்து வந்தது. வார இறுதிநாளான நேற்று யாரும் எதிர்பார்க்காத வகையில் தங்கம் விலை ெஜட் வேகத்தில் உயர்ந்தது. அதாவது நேற்று தங்கம் விலை கிராமுக்கு ரூ.140 உயர்ந்து ஒரு கிராம் தங்கம் ரூ.10,005க்கும், பவுனுக்கு ரூ.1,120 உயர்ந்து ஒரு பவுன் ரூ.80,040க்கு விற்பனையானது. இந்த விலை என்பது இது வரை தங்கம் விலை வரலாற்றில் இல்லாத புதிய உச்சமாகும். அதே நேரத்தில் கடந்த 25ம் தேதி முதல் நேற்று வரை தங்கம் விலை பவுனுக்கு ரூ.5600 வரை உயர்ந்து நகை வாங்குவோரை கடும் அதிர்ச்சிக்கு உள்ளாக்கியுள்ளது.

தங்கத்திற்கு போட்டியாக நேற்று வெள்ளி விலையும் உயர்வை தான் சந்தித்தது. வெள்ளி விலை கிராமுக்கு ரூ.2 உயர்ந்து ஒரு கிராம் வெள்ளி ரூ.138க்கும், கிலோவுக்கு இரண்டாயிரம் உயர்ந்து, பார் வெள்ளி ரூ.1 லட்சத்து 38 ஆயிரம் ரூபாய்க்கும் விற்கப்பட்டது. வரும் நாட்களில் அதிக அளவிலான திருமண முகூர்த்த தினங்கள் வருகிறது. அது மட்டுமல்லாமல் நவராத்திரி பண்டிகை வேறு வருகிறது. தொடர்ந்து அடுத்த மாதத்தில் தீபாவளி பண்டிகை வருகிறது. இப்படி தொடர்ச்சியாக திருமணம் மற்றும் பண்டிகை நாட்கள் வருகிறது. இந்த நேரத்தில் தங்கம் விலை ஜெட் வேகத்தில் அதிகரித்து வருவது விஷேச தினங்களுக்கு நகை வாங்க காத்திருப்பவர்களுக்கு அதிர்ச்சியையும், கூடுதல் செலவையும் ஏற்படுத்தியுள்ளது.

இது குறித்து தங்கம் நகை வியாபாரிகள் கூறுகையில், “இந்தியா ஏற்றுமதி செய்யும் பொருள்கள் மீது, அமெரிக்காவின் 50 சதவீத வரிவிதிப்பு எதிரொலியாக, அமெரிக்க டாலருக்கு நிகரான இந்திய ரூபாயின் மதிப்பு சரிந்திருப்பதே தங்கம் விலை உயர்வுக்கு முக்கிய காரணமாக கூறப்படுகிறது. மேலும், சர்வதேச சந்தையில் தங்கத்தின் மீதான முதலீடுகள் அதிகரித்திருப்பதும், உள்நாட்டு சந்தையில் தங்கம் விலை தொடர்ந்து உயரக் காரணமாகி வருகிறது. இதே நிலை நீடித்தால் தங்கம் விலை குறைய வாய்ப்பில்லை. மேலும் அதிகரிக்க தான் வாய்ப்புள்ளது” என்றனர். இன்று ஞாயிற்றுக்கிழமை என்பதால் தங்கம் மார்க்கெட்டுக்கு விடுமுறையாகும். அதனால், நேற்றைய விலையிலேயே இன்று தங்கம் விற்பனையாகும். நாளை(திங்கட்கிழமை) மார்க்கெட் தொடங்கிய பின்னரே தங்கம் விலையில் என்ன மாற்றம் ஏற்பட போகிறது என்பது தெரியவரும்.