தங்கம் பவுனுக்கு ரூ.560 சரிவு

சென்னை: தங்கம் விலை இம்மாதம் தொடக்கத்தில் இருந்து அதிரடியாக உயர்ந்து வந்தது. தினம், தினம் புதிய உச்சத்தையும் அடைந்து வந்தது. கடந்த 6ம் தேதி ஒரு பவுன் ரூ.75040க்கு விற்றது. இந்த விலை கடந்த மாதம் 23ம் தேதி ஒரு பவுன் ரூ.75040 என்ற உச்சபட்ச விலையை சமன் செய்தது. தொடர்ந்து 7ம் தேதி பவுனுக்கு ரூ.160 உயர்ந்து ஒரு பவுன் ரூ.75,200 என்றும், 8ம் தேதி பவுனுக்கு ரூ.560 அதிகரித்து ஒரு பவுன் ரூ.75,760 என்றும் அடுத்தடுத்து உயர்ந்து வரலாற்று உச்சத்தை பதிவு செய்தது.

இந்நிலையில் கடந்த 9ம் தேதி தங்கம் விலை பவுனுக்கு ரூ.200 குறைந்து பவுன் ரூ.75,560க்கு விற்கப்பட்டது. நேற்று முன்தினம் ஞாயிற்றுக்கிழமை என்பதால் தங்கம் விலையில் எந்தவித மாற்றமும் ஏற்படவில்லை. இந்நிலையில், வார தொடக்க நாளான நேற்று தங்கம் விலையில் மாற்றம் காணப்பட்டது. அதாவது நேற்று தங்கம் விலை கிராமுக்கு ரூ.70 குறைந்து ஒரு கிராம் தங்கம் ரூ.9,375க்கும், பவுனுக்கு ரூ.560 குறைந்து ஒரு பவுன் ரூ.75,000க்கும் விற்றது. வெள்ளி விலையில் மாற்றமில்லை. ஒரு கிராம் வெள்ளி ரூ.127க்கும், பார் வெள்ளி 1 லட்சத்து 27 ஆயிரம் ரூபாய்க்கும் விற்பனையானது.