ஆரம்பாக்கம் சிறுமி பாலியல் வன்கொடுமை வழக்கில் குற்றவாளி பற்றி தகவல் தெரிவிக்க தொடர்பு எண்: காவல்துறை வெளியிட்டது

கும்மிடிப்பூண்டி: ஆரம்பாக்கத்தில் பள்ளி முடிந்து வீடு திரும்பிய சிறுமியை ஒரு மர்ம நபர் கடத்தி சென்று பாலியல் வன்கொடுமை செய்த வழக்கு தொடர்பாக, அக்குற்றவாளியை பிடிக்க பொதுமக்களின் உதவியை காவல்துறை நாடியுள்ளது. இதுதொடர்பான தகவல்களை தெரிவிக்க இன்று மாவட்ட காவல்துறை தொடர்பு எண்ணை வெளியிட்டுள்ளது.கும்மிடிப்பூண்டி அருகே ஆரம்பாக்கம் பகுதியில் கடந்த 12ம் தேதி மாலை பள்ளி முடிந்து வீடு திரும்பிய 8 வயது சிறுமியை, ஒரு மர்ம நபர் கடத்தி சென்று பாலியல் வன்கொடுமை செய்துள்ளார். இதுதொடர்பான சிசிடிவி வீடியோ காட்சிகள் பல்வேறு சமூக வலைதளங்களில் வைரலாக பரவி மக்களிடையே கடும் அதிர்ச்சியை ஏற்படுத்தியது. இச்சம்பவம் நடந்து 9 நாட்களாகியும் இதுவரை குற்றவாளி கைது செய்யப்படவில்லை. இதுகுறித்து மாவட்ட கலெக்டர் மு.பிரதாப் கூறுகையில், குற்றவாளியை பிடிக்க காவல்துறை சார்பில் முழு நடவடிக்கை எடுக்கப்பட்டு வருகிறது. விரைவில் குற்றவாளி கைது செய்யப்படுவார். மேலும், பாதிக்கப்பட்ட சிறுமிக்கு தேவையான உதவிகள் செய்யப்பட்டு வருகிறது என்று தெரிவித்தார்.

இந்நிலையில், இவ்வழக்கு தொடர்பாக 9 தனிப்படைகள் அமைத்து மர்ம நபர் குறித்து போலீசார் விசாரித்து வருகின்றனர். இதுதொடர்பான குற்றவாளியின் புகைப்படம் மற்றும் புதிய சிசிடிவி காட்சிகளை இன்று காலை திருவள்ளூர் மாவட்ட காவல்துறை வெளியிட்டு, குற்றவாளியைப் பிடிப்பதில் பொதுமக்களின் உதவியை நாடியுள்ளது. மேலும், குற்றவாளி பற்றிய தகவல் தெரிந்தால், அவற்றை 9952060948 என்ற கைபேசி எண்ணை தொடர்பு கொண்டு பொதுமக்கள் தகவல் தெரிவிக்கலாம் என்று மாவட்ட காவல்துறையின் சமூக வலைதளப் பக்கத்தில் தகவல் வெளியிட்டு, பொதுமக்களுக்கு வேண்டுகோள் விடுக்கப்பட்டு உள்ளது.