தெலங்கானாவில் ஆலை அமைத்து தயாரிப்பு; ரூ.12,000 கோடி போதை பொருளுடன் கும்பல் சிக்கியது: ஐடி நிபுணர், வங்கதேச பெண் உட்பட 12 பேர் கைது

தானே: தெலங்கானாவில் செயல்பட்டு வந்த ஒரு பெரிய போதைப்பொருள் உற்பத்தி கும்பலை மகாராஷ்டிராவின் தானே மாவட்டத்தின் மீரா சாலை போலீசார் நேற்று கைது செய்தனர். அந்த கும்பலிடம் இருந்து ரூ.12,000 கோடி மதிப்புள்ள எம்.டி (மெபெட்ரோன்) போதைப்பொருட்களை பறிமுதல் செய்தனர். தெலங்கானாவின் சேரமல்லி பகுதியில் உள்ள தொழிற்சாலையில் நடந்த சோதனைகளின் போது போதைப்பொருள் தயாரிப்பில் பயன்படுத்தப்படும் சுமார் 35,000 லிட்டர் ரசாயனங்கள் கண்டுபிடிக்கப்பட்டதாக அதிகாரிகள் தெரிவித்தனர். பல ஆண்டுகளாக இயங்கி வரும் இந்த தொழிற்சாலையில் உற்பத்தி செய்யப்படும் பெரும்பாலான மருந்துகள் உள்ளூர் குற்றவாளிகள் மற்றும் முகவர்கள் மூலம் மும்பைக்கு வழங்கப்பட்டதாக விசாரணையில் தெரியவந்துள்ளது.

ரசாயன தொழிற்சாலை என்ற போர்வையில் இந்த மருந்துகள் ரகசியமாக தயாரிக்கப்பட்டு வந்தன. நூற்றுக்கணக்கான கிலோ மெபெட்ரோன் மருந்து தயாரிக்கப்பட்டு சந்தையில் வழங்கப்பட்டதாக மதிப்பிடப்பட்டுள்ளது என்று அதிகாரிகள் தெரிவித்தனர். ஒரு ரகசிய தகவலின் அடிப்படையில், மீரா-பயந்தர், வசாய்-விரார் போலீசார் மற்றும் குற்றப்பிரிவு போலீசார் இணைந்து கிட்டத்தட்ட ஒரு மாதமாக கண்காணித்து 60க்கும் மேற்பட்ட இடங்களில் சோதனை நடத்தி இதை கண்டுபிடித்தனர். இந்த வழக்கில் 12 பேரை போலீசார் கைது செய்துள்ளனர், இதில் மகாராஷ்டிராவின் மீரா சாலையில் கடந்த மாதம் ரூ.24 லட்சம் மதிப்புள்ள போதைப்பொருட்களுடன் பிடிபட்ட வங்கதேச பெண் பாத்திமா முராத் ஷேக் என்கிற மொல்லா (23) என்பவரும் ஒருவர்.

இந்த வழக்கில் முக்கிய குற்றவாளி ஒரு ஐடி நிபுணர், அவர் தனது ரசாயன அறிவை போதைப்பொருள் தயாரிக்க தவறாகப் பயன்படுத்தியது தெரிய வந்துள்ளது. கைது செய்யப்பட்டவர்களிடம் இருந்து 5.968 கிலோகிராம் ஆர்பிடி கிலோகிராம் எடையுள்ள மெபெட்ரோன், 27 மொபைல் போன்கள் பறிமுதல் செய்யப்பட்டுள்ளதாக தானே போலீஸ் கமிஷனர் நிகேத் கௌசிக் தெரிவித்தார்.