மூதாட்டியை தாக்கிய ‘மாஜி’ அதிமுக எம்பி: வீடியோ வைரலால் பரபரப்பு

ஓமலூர்: ஓமலூர் அருகே முன்னாள் அதிமுக எம்பி அர்ஜூனன், மூதாட்டி ஒருவரை சரமாரியாக தாக்கி கொலை மிரட்டல் விடுத்த வீடியோ, சமூக வலைதளங்களில் வேகமாக பரவி பரபரப்பை ஏற்படுத்தி உள்ளது. சேலம் மாவட்டம், மேச்சேரி ஒன்றியத்தில் காமனேரி கிராமம் உள்ளது. இங்கு தார்சாலை அமைக்கும் பணி நடந்து வருகிறது. அப்பகுதியில் வசிக்கும் மூதாட்டி சரோஜா(60) என்பவரது வீட்டை ஒட்டி, சாலை அமைக்கும் பணி மேற்கொள்ளப்பட்டது. இதற்கு சரோஜா, தனது வீட்டை ஒட்டி சாலை போடாமல், சற்று தள்ளி போடுமாறு சாலை பணியில் ஈடுபட்டவர்களிடம் கூறியுள்ளார்.

இந்த தகவலை கேள்விப்பட்ட முன்னாள் அதிமுக எம்பியும், முன்னாள் எம்எல்ஏவுமான அர்ஜூனன், சாலை பணி நடைபெறும் இடத்துக்கு வந்துள்ளார். அங்கு வந்த அவர், மூதாட்டி சரோஜாவிடம், ‘நீ எனது நிலத்தில் சாலை போட சொல்கிறாயா? என்று கூறி பொதுமக்கள் முன்னிலையில் அவரை சரமாரியாக அடித்து, கொலை மிரட்டல் விடுத்துள்ளார். இதனால் பாதிக்கப்பட்ட சரோஜா, ஓமலூர் அரசு மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்நிலையில், முன்னாள் எம்பி அர்ஜூனன், சரோஜாவை தாக்கும் வீடியோ, சமூக வலைதளங்களில் வைரலாக பரவி வருகிறது. இது குறித்து பாதிக்கப்பட்ட மூதாட்டி சரோஜா, மேச்சேரி காவல் நிலையத்தில் அர்ஜூனன் மீது புகார் தெரிவித்துள்ளார். இந்நிலையில், அதிமுக மாஜி எம்பி அர்ஜூனன் மீது கெட்ட வார்த்தையால் திட்டி கைகளால் தாக்கியதாகவும், பெண் வன்கொடுமை சட்டத்தின் கீழும், மேச்சேரி போலீசார் வழக்குப்பதிவு செய்து விசாரித்து வருகின்றனர்.

* அடிக்கடி சர்ச்சையில் சிக்கும் அர்ஜூனன்

மாஜி எம்பி அர்ஜூனன் கொரோனா காலக்கட்டத்தில், ஓமலூர் டோல்கேட்டில் போலீசாரை தாக்கி பரபரப்பை ஏற்படுத்தினார். அதிமுகவில் எம்பி, தேமுதிகவில் மாவட்ட பொறுப்பாளர் என பல்வேறு பதவியில் இருந்த இவர், தற்போது அரசியலில் இருந்து விலகி, விவசாயம் செய்து வருவதாக கூறப்படுகிறது. இந்நிலையில், தற்போது மூதாட்டி ஒருவரை தாக்கி மீண்டும் சர்ச்சையில் சிக்கியுள்ளார்.