முதல் டெஸ்ட் வெஸ்ட் இண்டீஸ் 162 ரன்னில் ஆல் அவுட்: சிராஜ், பும்ரா அசத்தல்; இந்தியா நிதான ஆட்டம்

அகமதாபாத்: வெஸ்ட் இண்டீஸ் கிரிக்கெட் அணி இந்தியாவில் சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடுகிறது. அதன்படி முதலாவது டெஸ்ட் போட்டி அகமதாபாத்தில் நேற்று தொடங்கியது. டாஸ் வென்ற வெஸ்ட் இண்டீஸ் அணி முதலில் பேட்டிங் செய்தது. துவக்க வீரர்களாக தேஜ்நரின் சந்தர்பால் மற்றும் ஜான் கேம்பெல் களமிறங்கினார். தேஜ்நரின் சந்தர்பால் ரன் எதுவும் எடுக்காமலும், ஜான் கேம்ப்பெல் 8 ரன்னிலும் ஆட்டமிழந்தனர். தொடர்ந்து வந்த அலிக் அதானேஸ் 12, பிரன்டன் கிங் 13 ரன்னில் அடுத்தடுத்து நடையை கட்டினர். இந்திய அணியின் அபார பந்து வீச்சால் வெஸ்ட் இண்டீஸ் அணி வீரர்கள் விக்கெட்டுகளை இழந்து தடுமாறினர்.

அதிகபட்சமாக ஜஸ்டின் கிரீவிஸ் 32, ஷேய் ஹோப் 26, கேப்டன் ரோஸ்டன் சேஸ் 24 ரன் எடுத்தனர். மற்றவர்கள் சொற்ப ரன்னில் ஆட்டமிழந்ததால் வெஸ்ட் இண்டீஸ் அணி 44.1 ஓவரில் அனைத்து விக்கெட்டுகளையும் இழந்து 162 ரன் மட்டுமே எடுத்தது. இந்திய பந்துவீச்சில் சிராஜ் 4, பும்ரா 3, குல்தீப் 2, வாஷிங்டன் சுந்தர் 1 விக்கெட் வீழ்த்தினர். அடுத்த முதல் இன்னிங்ஸை இந்திய அணி தொடங்கியது. துவக்க வீரர்களாக ஜெய்ஸ்வால், கே.எல்.ராகுல் களமிறங்கினர். ஜெயஸ்வால் 36 ரன்னிலும், அடுத்த வந்த சாய் சுதர்சன் 7 ரன்னிலும் ஆட்டமிழந்தனர். பின்னர், ஜோடி சேர்ந்த கே.எல்.ராகுல், சுப்மன் கில் நிதானமாக விளையாடினர். முதல் நாள் ஆட்ட நேர முடிவில் 2 விக்கெட்டு இழப்புக்கு 121 ரன் எடுத்தனர். கே.எல்.ராகுல் 53 ரன், கில் 18 ரன் எடுத்து ஆட்டமிழக்காமல் உள்ளனர்.