திரைப்பட ஷூட்டிங்கில் காரில் இருந்து தவறி விழுந்த சண்டை பயிற்சியாளர் பலி

நாகை: திரைப்பட இயக்குனர் பா.ரஞ்சித்தின் புதிய படத்திற்காக நாகை மாவட்டத்தில் பல்வேறு பகுதியில் படப்பிடிப்பு நடந்து வருகிறது. அதன்படி நேற்று நாகை அருகே விழுந்தமாவடி அளப்பகுதியில் அந்த படத்தின் சண்டை காட்சிக்கான படப்பிடிப்பு நடந்தது. இதில் நடிகர், நடிகைகள் ஏராளமானோர் பங்கேற்றனர். இதில் காஞ்சிபுரம் மாவட்டம் பூங்கண்டம் பகுதியை சேர்ந்த சண்டை பயிற்சியாளர் மோகன்ராஜ்(52) காரில் இருந்து தாவி செல்லும் காட்சிகள் படமாக்கப்பட்டன.

அப்போது மோகன்ராஜ் எதிர்பாராதவிதமாக காரிலிருந்து திடீரென தவறி கீழே விழுந்தார். இதனால் அவருக்கு நெஞ்சுவலி ஏற்பட்டது. இதையடுத்து மோகன்ராஜை சிகிச்சைக்காக நாகை அரசு மருத்துவக்கல்லூரி மருத்துவமனைக்கு கொண்டு சென்றனர். அங்கு டாக்டர்கள் பரிசோதனை செய்தபோது, அவர் ஏற்கனவே மோகன்ராஜ் இறந்து விட்டதாக தெரிவித்தனர். இதுகுறித்து போலீசார் வழக்குப்பதிந்து விசாரணை நடத்தி வருகின்றனர்.