122 தொகுதிகளில் இறுதிகட்ட வாக்குப்பதிவு விறுவிறுப்பு; பீகாரில் ஆட்சியை கைப்பற்றப் போவது யார்?.. இன்று மாலை கருத்துக்கணிப்பு முடிவு

* 14ம் தேதி வாக்கு எண்ணிக்கை

பாட்னா: பீகார் சட்டப்பேரவைக்கான இறுதிக்கட்ட தேர்தலில் 122 தொகுதிகளில் இன்று வாக்குப்பதிவு விறுவிறுப்பாக நடைபெற்று வருகிறது. இன்று மாலை கருத்துக் கணிப்பு முடிவுகளும், 14ம் தேதி வாக்கு எண்ணிக்கையும் நடப்பதால் எந்த கூட்டணி ஆட்சியை பிடிக்கும் என்ற எதிர்பார்ப்பு அதிகரித்துள்ளது. பீகார் மாநிலத்தில் மொத்தமுள்ள 243 சட்டப்பேரவை தொகுதிகளுக்கான தேர்தல் இரண்டு கட்டங்களாக அறிவிக்கப்பட்டது. இதில், முதல் கட்ட வாக்குப்பதிவு கடந்த 6ம் தேதி நடைபெற்றது. அந்த தேர்தலில் வரலாறு காணாத வகையில் 65 சதவீதத்திற்கும் அதிகமான வாக்குகள் பதிவானது. பீகாரின் அடுத்த ஐந்து ஆண்டு கால ஆட்சியை தீர்மானிக்கும் இரண்டாவது மற்றும் இறுதிக்கட்ட வாக்குப்பதிவு இன்று நடைபெறுகிறது. இன்றைய இறுதிக்கட்ட தேர்தலில், மேற்கு சம்பாரன், கிழக்கு சம்பாரன், சீதாமர்ஹி, மதுபானி, கயா, பாகல்பூர், பூர்ணியா உள்ளிட்ட 20 மாவட்டங்களில் உள்ள 122 தொகுதிகளுக்கு வாக்குப்பதிவு நடைபெறுகிறது.

காலை 7 மணிக்கு தொடங்கிய இந்த வாக்குப்பதிவில், சுமார் 3.70 கோடி வாக்காளர்கள் தங்கள் வாக்குகளை பதிவு செய்ய உள்ளனர். இதற்காக 45,399 வாக்குச்சாவடிகள் அமைக்கப்பட்டுள்ளன. இந்த தேர்தலில் 136 பெண் வேட்பாளர்கள் உட்பட மொத்தம் 1,302 வேட்பாளர்களின் அரசியல் எதிர்காலம் இன்று நிர்ணயிக்கப்பட உள்ளது. இந்தத் தேர்தல், தற்போதைய அரசில் இடம்பெற்றுள்ள 12 அமைச்சர்களின் அரசியல் எதிர்காலத்திற்கு மிக முக்கியமானதாகக் கருதப்படுகிறது. அமைச்சர்களான ரேணு தேவி (பெட்டியா தொகுதி), தர்கிஷோர் பிரசாத் (கட்டிஹார்), ஷீலா மண்டல் (புல்பாரஸ்), பிரேம் குமார் (கயா டவுன்), நிதிஷ் மிஸ்ரா (ஜஞ்சார்பூர்) ஆகியோர் மீண்டும் களம் காண்கின்றனர். இதேபோல், முன்னாள் முதல்வர் ஜிதன் ராம் மஞ்சியின் கட்சி போட்டியிடும் இமாம்கஞ்ச் தொகுதியும், காங்கிரஸ் மற்றும் பாஜக இடையே கடும் போட்டி நிலவும் பாகல்பூர் தொகுதியும் தேசிய அளவில் கவனத்தை ஈர்த்துள்ளன.

தேர்தல் அமைதியாகவும், நேர்மையாகவும் நடைபெறுவதை உறுதிசெய்ய தேர்தல் ஆணையம் தேவையான பாதுகாப்பு நடவடிக்கைகளை மேற்கொண்டுள்ளது. நான்கு லட்சத்திற்கும் அதிகமான பாதுகாப்புப் படையினர் பாதுகாப்புப் பணியில் ஈடுபடுத்தப்பட்டுள்ளனர். நேபாளம், உத்தரப்பிரதேசம், ஜார்கண்ட் மற்றும் மேற்கு வங்காளம் ஆகிய மாநிலங்களுடனான எல்லைகள் மூடப்பட்டுள்ளன. அனைத்து வாக்குச்சாவடிகளும் வெப்காஸ்டிங் மூலம் கண்காணிக்கப்படுகின்றன. இந்த தேர்தலில் பதிவாகும் வாக்குகள் அனைத்தும் வரும் 14ம் தேதி எண்ணப்பட்டு முடிவுகள் அறிவிக்கப்பட உள்ளன. பீகாரில் முதலமைச்சர் நிதிஷ் குமார் தலைமையிலான ஐக்கிய ஜனதா தளம் மற்றும் பாஜகவை உள்ளடக்கிய தேசிய ஜனநாயகக் கூட்டணியில், இந்துஸ்தானி அவா மோர்ச்சா, லோக் ஜன்சக்தி (ராம் விலாஸ்) போன்ற கட்சிகளும் அங்கம் வகிக்கின்றன.

இவர்களை எதிர்த்து, லாலுவின் மகனான தேஜஸ்வி யாதவ் தலைமையிலான ராஷ்ட்ரிய ஜனதா தளம், காங்கிரஸ் மற்றும் இந்திய கம்யூனிஸ்ட், மார்க்சிஸ்ட்-லெனினிஸ்ட் (விடுதலை) உள்ளிட்ட இடதுசாரிக் கட்சிகளை உள்ளடக்கிய ‘இந்தியா’ கூட்டணி (மகாகத்பந்தன்) போட்டியிடுகிறது. இவர்களுடன், பிரசாந்த் கிஷோரின் ‘ஜன் சுராஜ்’ கட்சி மற்றும் சில சுயேச்சைகளும் களத்தில் உள்ளன. பீகார் தேர்தலின் இறுதிக்கட்ட வாக்குப்பதிவு இன்றுடன் நிறைவடைவதால், இன்று மாலை 6.30 மணிக்கு மேல் தேர்தலுக்குப் பிந்தைய கருத்துக் கணிப்பு முடிவுகள் வெளியாக உள்ளன. தேர்தல் ஆணையத்தின் விதிமுறைப்படி, வாக்குப்பதிவு முடியும் வரை இக்கணிப்புகளை வெளியிடத் தடை உள்ளது. ‘சி-வோட்டர்’, ‘ஆக்சிஸ் மை இந்தியா’, ‘சாணக்யா’ உள்ளிட்ட பல முன்னணி நிறுவனங்கள் தங்களது கணிப்புகளை முக்கிய தொலைக்காட்சி சேனல்களில் வெளியிடத் தயாராகி வருகின்றன.

இந்தக் கருத்துக் கணிப்புகள், வாக்காளர்களின் மனநிலையை ஓரளவு பிரதிபலிக்கும் என்றாலும், இவை இறுதியான முடிவுகள் அல்ல. பீகாரில் அடுத்த ஆட்சியை அமைக்கப்போவது யார் என்பதை, வரும் 14ம் தேதி நடைபெறும் வாக்கு எண்ணிக்கையின் முடிவுகளே அதிகாரப்பூர்வமாகத் தீர்மானிக்கும்.