அண்ணா, எம்ஜிஆர், ஜெயலலிதாவை மறந்தவர் திராவிடத்தையும் மறந்துவிட்டார் எடப்பாடி: துணை முதல்வர் உதயநிதி ஸ்டாலின் குற்றச்சாட்டு

ஈரோடு: ஈரோடு மாவட்டம், எழுமாத்தூரில் நேற்று புதிய திராவிட கழகம் சார்பில் வெல்லட்டும் சமூக நீதி 6வது மாநில மாநாடு நடைபெற்றது. இதில் துணை முதல்வர் உதயநிதி ஸ்டாலின் கலந்துக்கொண்டு பேசியதாவது: திராவிடம் என்ற சொல்லை பெரியாரோ, அண்ணாவோ, கலைஞரோ பயன்படுத்திய வார்த்தை இல்லை. நாம் கண்டுபிடித்த வார்த்தை அல்ல.

1856ம் ஆண்டு கார்டுவெல் என்பவர் தென்னிந்திய மொழிகளை ஆராய்ந்து ஒரு புத்தகத்தை எழுதினார். அந்தப் புத்தகத்தின் தலைப்பு என்னுடைய தென்னிந்திய திராவிட ஒப்பிலக்கணம். இந்த நூலில் ஆரியர், திராவிடர் என்ற ஒரு இனத்தைக் குறிக்கும் பெயர் என்று எழுதியுள்ளார். இவ்வளவு தெளிவான வரலாறும், ஆய்வுகளும் இருந்தும் இன்றைக்கு வேண்டுமென்றே சில சங்கிகள் திராவிடம் என்ற வார்த்தைக்கு பல கதைகளை கற்பிக்கிறார்கள். குழப்பத்தை ஏற்படுத்துகிறார்கள்.

கடந்த வாரம் நடந்த நிகழ்ச்சியின் போது கவர்னர் ஆர்.என்.ரவி பேசும் போது திராவிடம் என்பது ஒரு கற்பனைச் சொல் என்று கூறியிருக்கிறார். . அதற்கு முதல்வர் மு.க.ஸ்டாலின் ஈரோட்டில் நடந்த விழாவில் கவர்னரின் திமிரை நாங்கள் அடக்கி காட்டுவோம் என்று கூறினார். கடந்த இரண்டு ஆண்டுகளுக்கு முன்பு கவர்னர் திராவிடத்தை விமர்சித்து பேசினார். அது குறித்து எடப்பாடி பழனிசாமியிடம் கேட்டபோது, அதை என்னிடம் கேட்கக் கூடாது அறிஞர்களிடம் தான் கேட்க வேண்டும்.

திராவிடம் பற்றி எனக்கு ஒன்றும் தெரியாது என்று கூறியவர் தான் எடப்பாடி பழனிசாமி. தன்னுடைய கட்சியில் திராவிடம் என்ற சொல்லை வைத்துவிட்டு அதையே விட்டுக் கொடுத்தவர் தான் எடப்பாடி பழனிசாமி. அந்தப் பெயரையே அவர் மறந்து விட்டார். திராவிடத்தை மட்டும் அவர் மறக்கவில்லை அண்ணா, எம்ஜிஆர், ஜெயலலிதா போன்றவர்களையே அவர் மறந்து விட்டார். இவ்வாறு அவர் பேசினார்.

* செங்கோட்டையன் கட்சி மாறவில்லை கிளைதான் மாறினார்

துணை முதல்வர் உதயநிதி ஸ்டாலின் பேசுகையில், ‘அதிமுக முன்னாள் அமைச்சர் ஒருவர் (செங்கோட்டையன்) ஆன்மிக பயணம் செல்வதாகக்கூறி அமித்ஷாவை சந்தித்துவிட்டு வந்து,அவருடைய அனுமதி மற்றும் ஆலோசனை பெற்று தற்போது இன்னொரு கட்சியில் போய் சேர்ந்து விட்டார்.அந்த அளவிக்கு அவர் கட்டுப்பாட்டுடன் வைத்துள்ளார். இது கட்சி மாற்றம் கிடையாது. கிளை மாற்றம். யார் வேண்டும் என்றாலும் எத்தனை கிளைகள் வேண்டும் என்றாலும் மாறட்டும்,தாவட்டும். யார் வந்தாலும் தி.மு.க. மற்றும் கூட்டணி கட்சியின் வெற்றியை தடுக்க முடியாது என்றார்.

* அமித்ஷாவுக்கு யார் சிறந்த அடிமை அதிமுகவில் போட்டி

‘எடப்பாடி பழனிசாமி மனதில் முழுக்க முழுக்க நிறைந்து இருப்பது, அமித்ஷா மட்டுமே. அதிமுகவில் அமித் ஷாவுக்கு நீ சிறந்த அடிமையா அல்லது நான் சிறந்த அடிமையா என்ற போட்டி நடந்து கொண்டிருக்கிறது. நான் தான் சிறந்த அடிமை என்று எடப்பாடி பழனிசாமி எட்டு அடி பாய்ந்தால், அதிமுகவில் இருக்கக்கூடிய இன்னும் சிலர் நான் தான் சிறந்த அடிமை என்று 16 அடி பாய்வதற்கு தயாராக இருக்கிறார்கள். தமிழ்நாட்டில் அதிமுக உள்பட பல கட்சிகளுக்கு டெல்லியில் இருக்கக்கூடிய அமித்ஷா வீடுதான் தலைமை அலுவலமாக செயல்பட்டு கொண்டிருக்கிறது’ என்று துணை முதல்வர் உதயநிதி ஸ்டாலின் தெரிவித்தார்.