துறை சார்ந்த தகவல்களை துல்லியமாக மக்களிடம் தெரிவிக்க அரசு செய்தி தொடர்பாளர்களாக மூத்த ஐஏஎஸ் அதிகாரிகள் நியமனம்: தமிழக அரசு உத்தரவு

தமிழ்நாடு அரசு துறைகளின் முக்கிய தகவல்கள், திட்டங்கள் மற்றும் தேவையான இனங்களில் செய்தி ஊடகங்கள் மூலமாக சரியான நேரத்தில் பொதுமக்களுக்கு எடுத்துரைப்பதற்கும், பிற அரசு துறைகளுடன் ஒருங்கிணைப்பதற்கும், மூத்த ஐஏஎஸ் அதிகாரிகளை அரசு செய்தி தொடர்பாளர்களாக தமிழக முதல்வர் மு.க.ஸ்டாலின் நியமித்துள்ளார். அதனடிப்படையில், அரசு கூடுதல் தலைமை செயலாளர்கள் டாக்டர் ஜெ. ராதாகிருஷ்ணன், ககன்தீப் சிங் பேடி, தீரஜ் குமார், பெ.அமுதா ஆகியோர் இப்பொறுப்பில் நியமிக்கப்பட்டுள்ளனர்.

இந்த அதிகாரிகள் எந்தெந்த துறை சம்மந்தமான செய்திகள் வெளியிட வேண்டும் என்பது குறித்து முதல்வர் உத்தரவுபடி அவர்களுக்கு துறைகள் ஒதுக்கப்பட்டுள்ளன. அதன்படி, டாக்டர் ஜெ.ராதாகிருஷ்ணனுக்கு எரிசக்தி துறை, மருத்துவம் மற்றும் மக்கள் நல்வாழ்வுத் துறை, போக்குவரத்து துறை, கூட்டுறவு, உணவு மற்றும் நுகர்வோர் பாதுகாப்பு துறை, வெளிநாடு வாழ் தமிழர் நலன், பள்ளி கல்வி துறை, உயர்கல்வி துறை, கைத்தறி, கைத்திறன், துணிநூல் மற்றும் கதர் துறை, மனிதவள மேலாண்மை துறை ஆகிய துறைகள் ஒதுக்கப்பட்டுள்ளது.

ககன்தீப் சிங் பேடிக்கு நகராட்சி நிர்வாகம் மற்றும் குடிநீர் வழங்கல் துறை, ஊரக வளர்ச்சி (ம) ஊராட்சி துறை, கால்நடை பராமரிப்பு, பால்வளம், மீன்வளம் மற்றும் மீனவர் நலத்துறை , வேளாண்மை மற்றும் உழவர் நலத்துறை, நீர்வள துறை, சுற்றுச் சூழல், காலநிலை மாற்றம் மற்றும் வனத்துறை, குறு, சிறு மற்றும் நடுத்தரத் தொழில் நிறுவனங்கள் துறை, தொழில், முதலீட்டு ஊக்குவிப்பு மற்றும் வர்த்தகத் துறை, இயற்கை வளங்கள் துறை ஆகிய துறைகள் ஒதுக்கப்பட்டுள்ளது.

தீரஜ் குமாருக்கு உள், மதுவிலக்கு மற்றும் ஆயத்தீர்வை துறை ஒதுக்கப்பட்டுள்ளது. பெ.அமுதாவுக்கு வருவாய் மற்றும் பேரிடர் மேலாண்மைத் துறை, சமூக நலன் மற்றும் மகளிர் உரிமைத் துறை, மாற்றுத் திறனாளிகள் நலத்துறை, தொழிலாளர் நலன் மற்றும் திறன் மேம்பாட்டு துறை, ஆதிதிராவிடர் மற்றும் பழங்குடியினர் நலத்துறை, பிற்படுத்தப்பட்டோர் மிகவும் பிற்படுத்தப்பட்டோர் மற்றும் சிறுபான்மையினர் நலத்துறை, வீட்டுவசதி மற்றும் நகர்புற வளர்ச்சித்துறை, நெடுஞ்சாலைகள் மற்றும் சிறுதுறைமுகங்கள் துறை, சுற்றுலா, பண்பாடு மற்றும் சமய அறநிலையத் துறை, சிறப்புத் திட்டச் செயலாக்கத் துறை ஆகிய துறைகள் ஒதுக்கப்பட்டுள்ளது.

அரசு செய்தி தொடர்பாளர்களுக்கு ஒதுக்கப்பட்டுள்ள துறைகளின் செயலாளர்கள், துறை சார்ந்த அறிவிப்புகள் மற்றும் சாதனைகளின் தகவல்களை அரசு செய்தி தொடர்பாளர்களுக்கு வழங்குவார்கள். அச்செய்திகளின் உண்மைத்தன்மையை உறுதி செய்த பின் தலைமை செயலாளரின் ஆலோசனையின் அடிப்படையில் அரசு செய்தி தொடர்பாளர்கள் செய்தி ஊடகங்களை சந்தித்து தகவல்களை துல்லியமாகவும், சரியாகவும் வெளியிடுவார்கள். அரசின் திட்டங்கள் மற்றும் தகவல்களை வேகமாகவும், சரியான தகவல்களை உரிய நேரத்தில் மக்களிடம் கொண்டு சேர்க்கவும் அரசு செய்தித் தொடர்பாளர்கள் நியமிக்கப்பட்டுள்ளனர். இவ்வாறு அதில் கூறப்பட்டுள்ளது.