டிட்வா புயல் கோர தாண்டவம் இலங்கையில் பலியானவர்களின் எண்ணிக்கை 334 ஆக உயர்வு

கொழும்பு: இலங்கையில் கடந்த சில நாட்களாக டிட்வா புயல் காரணமாக சூறாவளி காற்றுடன் கனமழை கொட்டி தீர்த்த்தது. தொடர் மழை, வெள்ளம், நிலச்சரிவு காரணமாக பல்வேறு பகுதிகளும் பாதிக்கப்பட்டுள்ளன. இலங்கையின் பேரிடர் மேலாண்மை மையம் நேற்று இரவு வெளியிட்ட புள்ளிவிவரங்களின்படி 334 பேர் உயிரிழந்துள்ளனர். மேலும் 228 பேர் காணாமல் போயுள்ளனர்.

இலங்கையில் புயலால் பாதிக்கப்பட்ட பகுதிகளில் ஆபரேஷன் சாகர் பந்து மீட்பு நடவடிக்கையை இந்தியா மேற்கொண்டுள்ளது.இதன் ஒரு பகுதியாக தேசிய பேரிடர் நிவாரணப் படை குழுவிற்கான உபகரணங்களை ஏற்றிச்சென்ற விமானம் நேற்று கொழும்புவில் தரையிறங்கியது. உதவிப்பொருட்களை ஏற்றிச்சென்ற ஐஎன்எஸ் ககன்யா விசாகப்பட்டினத்தில் இருந்து புறப்பட்டு விரைவில் இலங்கையை வந்தடையும் என்று எதிர்பார்க்கப்படுகின்றது.

முன்னதாக நேற்று முன்தினம் இந்திய விமானப்படையின் இரண்டு போக்குவரத்து விமானங்கள் கொழும்புவில் சுமார் 21 டன் நிவாரண பொருட்களை வழங்கின. இதனிடையே தொடர் மழையால் கொழும்பு விமான நிலையத்தில் சிக்கி தவித்த 32 இந்தியர்கள் பாதுகாப்பாக அழைத்து வரப்பட்டனர்.

வெள்ளத்தால் பாதிக்கப்பட்ட இலங்கைக்கு உணவு மற்றும் மனிதாபிமான உதவிப்பொருட்களை ஏற்றிச்சென்ற இரண்டு விமானங்கள் மூலமாக விமான நிலையத்தில் சிக்கி இருந்தவர்கள் மீட்டு அழைத்து வரப்பட்டனர். ஐஎல்76 விமானத்தில் திருவனந்தபுரத்துக்கும், சி130 விமானத்தில் டெல்லிக்கு பாதுகாப்பாக திரும்பினர்.