குற்றங்களை தடுக்க முன்னெச்சரிக்கை நடவடிக்கை எடுக்கா விட்டால் பதவி உயர்வுக்கு சிக்கல் நேரிடும்: காவல் ஆய்வாளர்களுக்கு எச்சரிக்கை

சென்னை: காவல் துறை உயர் அதிகாரிகள் ஆய்வாளர்களுக்கு கடும் எச்சரிக்கை விடுத்துள்ளனர். குற்றங்களைத் தடுக்க முன்கூட்டியே திட்டமிட்ட நடவடிக்கைகளை எடுக்காத ஆய்வாளர்களுக்கு பதவி உயர்வு வழங்குவதில் சிக்கல் ஏற்படும் என எச்சரிக்கை விடப்பட்டுள்ளது. இது காவல் துறையின் செயல்திறனை மேம்படுத்துவதற்கான முக்கியமான நடவடிக்கையாக கருதப்படுகிறது. அதன்படி, பழிக்குப் பழி வாங்க துடிக்கும் நபர்களை முன்கூட்டியே அடையாளம் கண்டு கண்காணிக்க வேண்டும். குடும்ப சண்டைகள், சொத்து தகராறுகள், பழைய பகைமைகள் போன்றவற்றில் ஈடுபட்டவர்கள் மீது சிறப்பு கவனம் செலுத்த வேண்டும். இவர்களின் நடமாட்டத்தை தொடர்ந்து கண்காணித்து, குற்றச் செயல்களில் ஈடுபடுவதற்கு முன்பே தடுக்கும் நடவடிக்கைகள் எடுக்க வேண்டும்.

சாலை வழிப்பறி சம்பவங்களை தடுக்க பல்வேறு இடங்களில் செக் போஸ்ட்டுகளை அதிகரிக்க உத்தரவிடப்பட்டுள்ளது. குறிப்பாக மாலை மற்றும் இரவு நேரங்களில் தீவிர கண்காணிப்பு,வெளியூர் செல்லும் சாலைகளில் கூடுதல் பாதுகாப்பு,சந்தேகத்திற்கிடமான வாகனங்களை சோதனை செய்தல்,வழிப்பறியில் ஈடுபடும் வழக்குகள் உள்ளவர்களை கண்காணித்தல் வேண்டும். ஒவ்வொரு காவல் நிலைய எல்லைகளிலும் நிகழும் குற்றங்களை வகைப்படுத்தி ஆய்வு செய்ய வேண்டும். எந்தப் பகுதிகளில் எந்த வகை குற்றங்கள் அதிகம் நடக்கின்றன என்பதை அடையாளம் காணுதல், குற்றங்கள் நிகழும் நேரம் மற்றும் முறைகளை பகுப்பாய்வு செய்தல்,குற்றவாளிகளின் செயல்பாட்டு முறைகளை புரிந்துகொள்ள வேண்டும் எனவும், காவல் ஆய்வாளர்கள் தங்கள் பகுதிகளுக்கு நேரடியாக சென்று களப்பணி மேற்கொள்ள வேண்டும்.

அலுவலகத்தில் மட்டும் அமர்ந்து வேலை செய்வது போதாது. மக்களுடன் நேரடி தொடர்பு கொண்டு, உள்ளூர் தகவல்களை சேகரித்து, குற்றங்களை முன்கூட்டியே கணித்து தடுக்கும் திறன் வேண்டும் என காவல் ஆய்வாளர்கள் மற்றும் டிஎஸ்பிக்களுக்கு வலியுறுத்தப்பட்டுள்ளது. இனி பதவி உயர்வுகள் வழங்கும்போது குற்ற விகிதம் குறைப்பில் காட்டிய செயல்திறன்,முன்னெச்சரிக்கை நடவடிக்கைகளின் வெற்றி விகிதம்,மக்கள் பாதுகாப்பு உணர்வில் ஏற்பட்ட முன்னேற்றம், புகார்களுக்கு விரைவான தீர்வு காணுதல் போன்ற அம்சங்கள் கணக்கில் எடுத்துக்கொள்ளப்படும் என அறிவுறுத்தப்பட்டுள்ளது. இந்த கடுமையான நடவடிக்கைகள் மூலம் குற்ற விகிதத்தை கணிசமாக குறைத்து, பொதுமக்களுக்கு பாதுகாப்பான சூழலை உருவாக்குவதே காவல் துறையின் முக்கிய நோக்கமாகும்.