திருவண்ணாமலையில் தீபத்திருவிழாவிற்காக அமைக்கப்படும் தற்காலிக பஸ் நிலையங்களில் கலெக்டர் நேரடி ஆய்வு

*அடிப்படை வசதிகளை மேம்படுத்த நடவடிக்கை

திருவண்ணாமலை : திருவண்ணாமலையில் கார்த்திகை தீபத்திருவிழாவிற்காக அமைக்கப்படும் தற்காலிக பஸ் நிலையங்களில் கலெக்டர் தர்ப்பகராஜ் ஆய்வு நடத்தினார். அப்போது அடிப்படை வசதிகளை மேம்படுத்த நடவடிக்கை மேற்கொண்டார்.

திருவண்ணாமலையில் பிரசித்தி பெற்ற கார்த்திகை தீபத்திருவிழா வெகு விமரிசையாக நடந்து வருகிறது. அடுத்த மாதம் 3ம் தேதி மகா தீப பெருவிழா நடக்கிறது. அதைத்தொடர்ந்து, 4ம் தேதி பவுர்ணமி கிரிவலம் அமைந்துள்ளது.

எனவே வரும் 2ம் தேதி முதல் 5ம் தேதி வரை பக்தர்கள் வருகை தொடர்ந்து இருக்கும் எனவும், இந்த ஆண்டு அதிகபட்சம் 40 லட்சம் பக்தர்கள் வருவார்கள் எனவும் எதிர்பார்க்கப்படுகிறது.

அதையொட்டி, நகரின் முக்கிய சாலை சந்திப்புகளில் 11 பெரிய மற்றும் 13 சிறிய அளவில் என மொத்தம் 24 இடங்களில் தற்காலிக பஸ் நிலையங்கள் அமைக்கப்படுகிறது.

மேலும் அரசு போக்குவரத்துக் கழகம் சார்பில் 4764 சிறப்பு பஸ்கள், 200 தனியார் சிறப்பு பஸ்கள், ஆந்திர மாநில அரசு போக்குவரத்துக் கழகம் சார்பில் 500 சிறப்பு பஸ்கள், கர்நாடக அரசு போக்குவரத்துக் கழகம் சார்பில் 20 சிறப்பு பஸ்கள் உள்பட மொத்தம் 5484 சிறப்பு பஸ்கள் இயக்க திட்டமிடப்பட்டுள்ளது.

அதையொட்டி, செங்கம் சாலை, திருக்கோவிலூர் சாலை உள்ளிட்ட இடங்களில் அமையும் தற்காலிக பஸ் நிலையங்களில் பயணிகள் வசதிக்காக மேற்கொள்ளப்படும் அடிப்படை வசதிகள் குறித்து கலெக்டர் தர்ப்பகராஜ், எஸ்பி சுதாகர் ஆகியோர் நேற்று நேரடி ஆய்வு நடத்தினார்.அப்போது குடிநீர் வசதி, கூடுதல் சுகாதார வளாகங்கள், மருத்துவ முகாம்கள் போன்றவற்றை ஏற்படுத்த உத்தரவிட்டனர்.

மேலும் மழைக்கான வாய்ப்பு உள்ளதால், மழைநீர் வழியாத வகையில் நிழற்கூடங்கள் அமைக்கவும், எளிதில் மழைநீர் வழிந்து செல்லும் வகையில் பஸ் நிலையங்களில் வசதிகளை செய்யவும் உத்தரவிட்டனர்.

அதோடு, சிசிடிவி கண்காணிப்பு கேமராக்கள் பொருத்தவும், பக்தர்களுக்கு வழிகாட்டுதல் வழங்குவதற்கான பொது தகவல்களை ஒலிபரப்ப வசதியும் செய்ய வேண்டும் என்றனர்.ஆய்வின்போது, மாவட்ட வழங்கல் அலுவலர் சதீஷ்குமார், மாநகராட்சி ஆணையர் செல்வபாலாஜி மற்றும் போக்குவரத்துக் கழக அலுவலர்கள் உள்ளிட்டோர் உடனிருந்தனர்.