கோவையில் வீடு புகுந்து நகை, பணம் கொள்ளை

கோவை : கோவை கோவைப்புதூர் பகுதியை சேர்ந்தவர் சாமுவேல்ராஜ் (75). இவர், இரவு வீட்டில் மனைவியுடன் தூங்கிக்கொண்டிருந்தார். நேற்று முன்தினம் அதிகாலை 3 மணியளவில் சாமுவேல்ராஜின் மனைவி கழிப்பறைக்கு செல்வதற்காக எழுந்து சென்றார். அப்போது, வீட்டின் மற்றொரு படுக்கை அறையின் கதவு திறந்து கிடந்தது.

அங்கு சென்று பார்த்தபோது பீரோவில் வைக்கப்பட்டிருந்த தங்க செயின், கம்மல், வளையல் உள்ளிட்ட 10 பவுன் தங்க நகைகள் மற்றும் ரூ.5 ஆயிரம் ரொக்க பணம் கொள்ளையடிக்கப்பட்டு இருந்ததை கண்டு அதிர்ச்சி அடைந்தார்.

இதுகுறித்து சாமுவேல்ராஜ் குனியமுத்தூர் போலீசாருக்கு தகவல் தெரிவித்தார். போலீசார் மற்றும் கைரேகை நிபுணர்கள் சம்பவ இடத்திற்கு விரைந்தனர். முதல்கட்ட விசாரணையில், சாமுவேல்ராஜ் வீட்டின் அருகில் உள்ள வீடு மற்றும் கடைகள் என 5 இடங்களில் கொள்ளை முயற்சி நடந்திருப்பது தெரியவந்தது.

இதைத்தொடர்ந்து, போலீசார் அங்கு பதிவாகி இருந்த கைரேகைகளை பதிவுசெய்தனர். மேலும், அந்த பகுதியில் உள்ள சிசிடிவி கேமரா காட்சிகளை ஆய்வு செய்தனர்.அதில், கொள்ளையன் முகமூடி அணிந்து வீடுகளை நோட்டமிடும் காட்சிகள் பதிவாகி இருந்தது. அதையும் போலீசார் கைப்பற்றினர்.

சாமுவேல்ராஜ் அளித்த புகாரின்பேரில் போலீசார் வழக்கு பதிவு செய்து, கொள்ளையனை தேடி வருகின்றனர். அடுத்தடுத்து கொள்ளை முயற்சி நடத்திருப்பது அப்பகுதி மக்களிடையே பீதியை ஏற்படுத்தி உள்ளது.