சில்லி பாய்ன்ட்...

* 651 விக்கெட் வீழ்த்தி ரஷித் கான் சாதனை

லண்டன்: இங்கிலாந்தில் நடந்து வரும் ஆடவருக்கான 100 பந்து கிரிக்கெட் தொடரில் (5 பந்துகள் வீதம் 20 ஓவர்), லண்டன் அணிக்கு எதிரான போட்டியில் ஓவல் இன்வின்சிபிள் அணிக்காக ஆடிய ஆப்கானிஸ்தான் பந்து வீச்சாளர் ரஷித் கான் 3 விக்கெட் வீழ்த்தினார். இதன் மூலம் டி20 கிரிக்கெட்டில் 651 விக்கெட் வீழ்த்திய முதல் வீரர் என்ற சாதனையை நிகழ்த்தினார். இப்பட்டியலில், வெஸ்ட் இண்டீஸ் வீரர் டுவைன் பிராவோ, 631 விக்கெட்டுகளுடன் 2ம் இடத்தில் உள்ளார்.

* ஆசிய கோப்பையில் ரிஷப் பண்ட் இல்லை

புதுடெல்லி: இங்கிலாந்துடன் நடந்த 4வது டெஸ்ட் போட்டியின்போது, இந்திய அணி விக்கெட் கீப்பர் ரிஷப் பண்ட் காலில் காயம் ஏற்பட்டது. அதற்காக சிகிச்சை பெற்று வரும் அவர், வரும் செப்டம்பர் 9ம் தேதி துவங்கவுள்ள ஆசிய கோப்பை கிரிக்கெட் போட்டியில் பங்கேற்க மாட்டார் என தகவல்கள் கூறுகின்றன. மேலும், இந்தியா வருகை தரும் வெஸ்ட் இண்டீசுடனான 2 டெஸ்ட் போட்டிகள் கொண்ட தொடரிலும், பண்ட் ஆடமாட்டார் என கூறப்படுகிறது.

* மார்ஷ், டிராவிஸ் ஹெட் டி20 துவக்க வீரர்கள்

சிட்னி: அடுத்தாண்டு நடைபெறவுள்ள டி20 உலகக் கோப்பை போட்டிகள் வரை, ஆஸ்திரேலியா டி20 கிரிக்கெட் அணியின் துவக்க வீரர்களாக, கேப்டன் மிட்செல் மார்ஷ், டிராவிஸ் ஹெட் செயல்படுவார்கள் என அறிவிக்கப்பட்டுள்ளது. டி20 போட்டிகளில் இவர்கள் இருவரும் இதுவரை துவக்க வீரர்களாக ஆடியதில்லை. இருப்பினும், இந்த வகை போட்டிகளில் இருவரும் அதிரடியாக ரன் குவிப்பில் ஈடுபட்டு அசத்தி உள்ளது குறிப்பிடத்தக்கது.