ஏறிய வேகத்தில் இறங்கிய தங்கம் விலை: சவரனுக்கு ரூ.1,120 குறைந்து ரூ.91,200க்கு விற்பனை

சென்னை: சென்னையில் தங்கம் விலை சவரனுக்கு ரூ.1,120 குறைந்தது. தங்கம் விலை கடந்த 17ம் தேதி ஒரு பவுன் ரூ.97,600க்கு விற்பனையாகி வரலாற்று உச்சத்தை பதிவு செய்தது. அதன் பிறகு தங்கம் விலை இறங்குவதும், ஏறுவதுமாக இருந்து வருகிறது. தொடர்ந்து 22ம் தேதி(நேற்று முன்தினம்) தங்கம் விலை காலை, மாலை என பவுனுக்கு ரூ.3680 வரை குறைந்து ஒரு பவுன் ரூ.92,320க்கு விற்பனையானது. இதே போல நேற்றும் தங்கம் விலை குறைந்தது. நேற்று தங்கம் விலை கிராமுக்கு ரூ.40 குறைந்து ஒரு கிராம் ரூ.11,500க்கும், பவுனுக்கு ரூ.320 குறைந்து ஒரு பவுன் ரூ.92,000க்கும் விற்பனையானது.

இது நகை வாங்குவோருக்கு சற்று ஆறுதலை ஏற்படுத்தியிருந்தது. இதே போல தொடர்ந்து தங்கம் விலை குறையும் என்று நகை வாங்குவோர் எதிர்ப்பார்த்து இருந்தனர். ஆனால், இன்று காலையில் தங்கம் விலையில் மீண்டும் மாற்றம் காணப்பட்டது. அதாவது, இன்று காலையில் தங்கம் விலை கிராமுக்கு ரூ.40 உயர்ந்து ஒரு கிராம் ரூ.11,540க்கும், பவுனுக்கு ரூ.320 உயர்ந்து ஒரு பவுன் ரூ.92,320க்கும் விற்பனையானது. இதன் மூலம் தங்கம் விலை மீண்டும் பவுன் ரூ.92 ஆயிரத்தை தாண்டியுள்ளது. கடந்த சில நாட்களாக வெள்ளி விலை குறைந்து வருகிறது. அந்த வகையில், இன்றும் வெள்ளி விலை குறைந்தது.

இன்று காலையில் வெள்ளி விலை கிராமுக்கு 3 ரூபாய் குறைந்து ஒரு கிராம் வெள்ளி 171 ரூபாய்க்கும், கிலோவுக்கு மூவாயிரம் ரூபாய் குறைந்து பார் வெள்ளி ஒரு லட்சத்து 71 ஆயிரம் ரூபாய்க்கும் விற்பனையானது. இந்நிலையில் சென்னையில் ஆபரணத் தங்கம் விலை சவரனுக்கு ரூ.1,120 குறைந்து ரூ.91,200க்கு விற்பனை செய்யப்படுகிறது. சென்னையில் ஆபரணத்தங்கத்தின் விலை சவரனுக்கு நேற்றைய விலையைவிட ரூ.800 குறைவாக உள்ளது. தங்கம் விலை கிராமுக்கு ரூ.140 குறைந்து ஒரு கிராம் ரூ.11,400க்கு விற்பனை செய்யப்படுகிறது. சென்னையில் சில்லறை வர்த்தகத்தில் வெள்ளி விலை கிராமுக்கு ரூ.1. குறைந்து ஒரு கிராம் ரூ.170க்கு விற்பனை செய்யப்படுகிறது.