செங்கல்பட்டு மாவட்டத்தில் டிட்வா புயல் முன்னெச்சரிக்கையாக 287 வெள்ள நிவாரண முகாம்; 20 புயல் பாதுகாப்பு மையங்கள்: பாதிப்பு ஏற்படும் இடங்களில் அனைத்து வசதிகளும் தயார்

செங்கல்பட்டு: டிட்வா புயல் முன்னெச்சரிக்கை நடவடிக்கையாக செங்கல்பட்டு மாவட்டத்தில் 287 வெள்ள நிவாரண முகாம்கள் மற்றும் 20 புயல் பாதுகாப்பு மையங்கள் தயார் நிலையில் உள்ளன.வடகிழக்கு பருவமழை தீவிரமடைந்துள்ள நிலையில், தமிழகத்தில் டிட்வா புயல் உருவாகியுள்ளது. இந்த புயல் புதுச்சேரியில் கரையை கடக்குமென்று வானிலை ஆய்வு மையம் கூறியுள்ளது. செங்கல்பட்டு மாவட்டத்திற்கு இந்த புயலால் பாதிப்புகள் அதிகளவில் இருக்குமென்று எதிர்பார்க்கப்படுகிறது. ஆகையால் செங்கல்பட்டு மாவட்ட நிர்வாகம், மாவட்டம் முழுவதும் விரிவான முன்னெச்சரிக்கை மற்றும் பாதுகாப்பு ஏற்பாடுகளை மேற்கொண்டுள்ளது.

பொதுமக்களை பாதுகாக்க அனைத்து துறைகளும் தயார் நிலையில் உள்ளது. மாவட்டத்தில் மொத்தம் 54 இடங்களில் சமூக சமையலறைகள் தயார் நிலையில் உள்ளன. மின்வாரியம் மூலம் மின்கம்பங்கள் மற்றும் மின்சார உபகரணங்கள் போதுமான அளவில் கையிருப்பில் வைக்கப்பட்டுள்ளன. அவசர சூழ்நிலையில் மக்கள் தங்குவதற்காக 287 வெள்ள நிவாரண முகாம்கள், 20 புயல் பாதுகாப்பு மையங்கள் தயார்நிலையில் உள்ளன. கூடுதலாக கானாத்தூர், நெம்மேலி, பட்டிபுலம் ஆகிய இடங்களில் 3 பல்நோக்கு புயல் பாதுகாப்பு மையங்களும் செயல்பாட்டில் உள்ளன.

தாம்பரம் மாநகராட்சி முடிச்சூரில் 30 நபர்கள் அடங்கிய தேசிய பாதுகாப்பு மீட்பு குழு தயார் நிலையில் உள்ளது. மேலும் கூடுவாஞ்சேரியில் 25 நபர்கள் அடங்கிய மாநில பேரிடர் மீட்பு குழுவினர் தயார் நிலையில் வைக்கப்பட்டுள்ளனர். மாவட்டம் முழுவதும் வெள்ள பாதிப்பு ஏற்படும் பகுதிகளாக 390 இடங்கள் கண்டறியப்பட்டுள்ளது. இதில் மிக அதிகளவில் பாதிக்கக்கூடிய பகுதிகளாக 71 இடங்கள் கண்டறியப்பட்டுள்ளது. இந்த பகுதிகளுக்கு உணவு மற்றும் அத்தியாவசிய தேவைகளுக்கான அனைத்து வசதிகளும் தயார் நிலையில் வைக்கப்பட்டுள்ளன.

மீட்பு நடவடிக்கைகளுக்கு தேவையான படகுகள், இயந்திரப்படகுகள், மர அறுவை இயந்திங்கள், நீர் இரைக்கும் இயந்திரங்கள், பொக்லைன், கிரேன், ஜெனரேட்டர்கள், பரிசல், டிராக்டர், ஆகியவை தயார் நிலையில் உள்ளன. மேலும் வெள்ள நீர் தடுப்பு பணிகளுக்காக மணல் மூட்டைகள் கையிருப்பில் வைக்கப்பட்டுள்ளது. அரசு மருத்துவமனைகளில் மருத்துவர்கள் மற்றும் செவிலியர்கள் 24 மணி நேரமும் பணியில் இருக்குமாறு அறிவுறுத்தப்பட்டுள்ளது. தேவையான மருந்துகள், மருத்துவ உபகரணங்கள் கையிருப்பில் வைத்திருக்குமாறு அறிவுறுத்தப்பட்டுள்ளது. மருத்துவமனைகளில் ஜெனரேட்டர்கள் தயார் நிலையில் உள்ளதது உறுதி செய்யப்பட்டுள்ளது. மேலும் 4 முதல் 5 நாட்களுக்குள் பிரசவிக்கும் கர்ப்பிணி பெண்களை முன்னெச்சரிக்கை நடவடிக்கையாக முன்கூட்டியே மருத்துவமனைகளில் அனுமதிக்க அறிவுறுத்தப்பட்டுள்ளது.

மாவட்டம் முழுவதும் 33 மண்டல அளவிலான பல்துறை கண்காணிப்பு குழுக்கள் அமைக்கப்பட்டுள்ளன. மாவட்ட ஆட்சியர் அலுவலகத்தில் அவசரகால கட்டுப்பாட்டு அறை இயங்கிவருகிறது. பொதுமக்கள் டிட்வா புயலால் பாதிப்பு ஏற்பட்டால் மாவட்ட ஆட்சியர் அலுவலகத்தில் உள்ள கட்டுப்பாட்டு அறையினை தொடர்பு கொண்டு மழை மற்றும் புயலால் ஏற்படும் புகார்களை தெரிவிக்கலாம் என்று கலெக்டர் சினேகா தெரிவித்துள்ளார்.சார் ஆட்சியர் ஆய்வு திருப்போரூர் தாலுகாவில் டிட்வா புயல் காரணமாக பாதிப்பு ஏற்படும் இடங்களை செங்கல்பட்டு சார் ஆட்சியர் மாலதி ஹெலன் நேற்று பார்வையிட்டு ஆய்வு செய்தார். பட்டிபுலம் இருளர் குடியிருப்பை பார்வையிட்ட அவர் அங்கு குடிசைகளில் தங்கியிருந்த மக்களை சமுதாயக் கூடத்தில் தங்க வைக்குமாறு அறிவுறுத்தினார்.

இதையடுத்து தையூர் ஊராட்சியில் பெரிய ஏரியில் இருந்து வெளியேறும் உபரிநீர் கால்வாயை பார்வையிட்டார். தொடர்ந்து காலவாக்கத்தில் மாதா அமிர்தானந்தமயி நிர்வாகம் சார்பில் கட்டப்படும் கட்டுமானப்பணியில் வெள்ளநீர் கால்வாய் ஆக்கிரமிக்கப்பட்டுள்ளதாக வந்த புகாரையடுத்து அதை பார்வையிட்டு ஆக்கிரமிப்புகளை அகற்றுமாறு அதிகாரிகளுக்கு உத்தரவிட்டார். இதையடுத்து காலவாக்கத்தில் உள்ள தீயணைப்பு மையத்திற்கு சென்ற அவர் புயல் பாதுகாப்பின்போது பொதுமக்களை பாதுகாக்க தேவையான கருவிகள் தயார் நிலையில் உள்ளதா என ஆய்வு செய்தார். 24 மணி நேரமும் தீயணைப்பு படையினர் தயாராக இருக்க வேண்டும் என்று அவர் கேட்டுக் கொண்டார். ஆய்வின்போது திருப்போரூர் வட்டாட்சியர் சரவணன் உடன் இருந்தார்.