பட்ஜெட் உரையில் பெயர் இல்லாவிட்டாலும் எந்த மாநிலத்துக்கும் பணம் மறுக்கப்படவில்லை: நிர்மலா சீதாராமன் விளக்கம்

புதுடெல்லி: பட்ஜெட் உரையில் பெயர் இல்லாவிட்டாலும் எந்த மாநிலத்திற்கும் பணம் மறுக்கப்படவில்லை என்று நிர்மலா சீதாராமன் கூறினார். மக்களவையில் பட்ஜெட் மீதான விவாதத்தில் எதிர்க்கட்சிகள் குற்றச்சாட்டுக்கு பதிலளித்து ஒன்றிய நிதியமைச்சர் நிர்மலா சீதாராமன் கூறியதாவது: இந்தியாவின் சமூக கட்டமைப்பு, நாடாளுமன்ற மரபுகள், பொருளாதாரம் மற்றும் ஆயுதப்படைகள் ஆகிய நான்கும் தற்போது கடுமையாக தாக்கப்படுகின்றன.

நாட்டில் ஸ்திரமின்மை மற்றும் அராஜகம் ஏற்பட்டால், விக்சித் பாரத் நோக்கிய பயணம் மிகவும் கடினமாக இருக்கும், இது ஒரு பெரிய சவால். இன்று, ஒரு சதி மூலம், சமூகத்தில் ஒருவருக்கொருவர் அவநம்பிக்கை உருவாக்கப்படுகிறது. ஒரு தீப்பொறி கூட பல மோதலுக்கு வழிவகுக்கும் அத்தகைய சூழ்நிலையை உருவாக்க முயற்சிகள் மேற்கொள்ளப்பட்டு வருகின்றன.இதேபோல், ஆயுதப்படைகள் மீதான தாக்குதல்களும் ஏதோ ஒரு சாக்குப்போக்கில் தீவிரப்படுத்தப்படுகின்றன.

அக்னிபாத் தொடர்பாக இன்று என்ன நடந்தாலும் அது இந்த சதியின் ஒரு பகுதியாகும். தொழில் செய்பவர்கள் மீது சமூகத்தில் எதிர்மறையான கருத்து பரப்பப்படுகிறது. வணிகம் மற்றும் செல்வத்தை உருவாக்குபவர்கள் மீதான வெறுப்பு எங்கும் பரவுகிறது. இந்தியா முதலீட்டாளர்களுக்கு பாதுகாப்பானது அல்ல என்று உலகம் முழுவதும் ஒரு செய்தியை அனுப்ப சதி உள்ளது. இது நல்லதல்ல. இதுபோன்ற உறுதியற்ற தன்மையை உருவாக்கும் மக்களுக்கு பாடம் கற்பிக்க நாம் அனைவரும் ஒன்றிணைந்து போராட வேண்டும்.

இதற்குப் பின்னால் ஒரு பெரிய தொடர்பு உள்ளது. இது தெருக்களில் தொடங்கி நாடாளுமன்றம் வரை இந்த சதி நடக்கிறது. நீங்கள் பதில்களைக் கூட கேட்கவில்லை. நான் சொல்வதை கூட நீங்கள் கேட்க விரும்பவில்லை. பட்ஜெட் உரையில் எந்த மாநிலத்தின் பெயரையும் குறிப்பிடவில்லை என்றால், அந்த மாநிலத்துக்கு பட்ஜெட்டில் ஒதுக்கீடு எதுவும் கிடைக்காது என எதிர்க்கட்சித் தலைவர்கள் தவறாகப் பேசுகிறார். எந்த மாநிலத்துக்கும் பணம் மறுக்கப்படவில்லை.

2004-2005 பட்ஜெட்டில் 17 மாநிலங்களின் பெயரை குறிப்பிடவில்லை. அப்படியானால் அந்த சமயத்தில் அந்த 17 மாநிலங்களுக்கு பணம் செல்லவில்லையா? .இப்போது இருந்ததை விட ஆங்கிலேயர்களின் கீழ் சமத்துவமின்மை குறைவாக இருந்தது என்று கூறுவது வெட்கக்கேடானது. இவ்வாறு அவர் பேசினார். அதன்பின் ஒன்றிய பட்ஜெட் மக்களவையில் நிறைவேற்றப்பட்டது.

* அல்வா கிண்டுவது உணர்ச்சிகரமான விஷயம்

நிர்மலா சீதாராமன் கூறுகையில்,’பட்ெஜட்டிற்கு முன்பு அல்வா கிண்டுவது ஒரு உணர்வுபூர்வமான விஷயம். இவ்வளவு முக்கியமான விஷயத்தை எப்படி இவ்வளவு லேசாக சமாளிக்க முடியும். 2013-14ம் ஆண்டில் அல்வா விழா ஏன் ரத்து செய்யப்படவில்லை? உங்களிடம் (ராகுல்காந்தி) ரிமோட் கண்ட்ரோல் சக்தி இருந்தது. அந்த நேரத்தில் எத்தனை எஸ்சி, எஸ்டி, ஓபிசி அதிகாரிகள் விழாவில் இருந்தனர்?. இப்போது நடப்பது சதி. அதனால்தான் இந்தக் கேள்வியை இப்போது கேட்கிறார்கள். அனைவரிடமும் ஜாதியைக் கேட்டு ஏன் மக்களைப் பிரிக்க வேண்டும்?’ என்று கேள்வி எழுப்பினார்.