ஊட்டி எம்எல்ஏ அலுவலக வளாகத்தில் அடையாளம் தெரியாத முதியவர் சடலம் மீட்பு

ஊட்டி : ஊட்டி எம்எல்ஏ அலுவலகம் தமிழ்நாடு ஓட்டல் சாலையில் உள்ளது. ஊட்டி தொகுதி எம்எல்ஏ.,வாக தற்போது காங்கிரஸ் கட்சியை சேர்ந்த கணேஷ் உள்ளார். இந்நிலையில், தொகுதி பிரச்னைகள் மற்றும் வளர்ச்சி பணிகளுக்காக தினசரி ஏராளமான பொதுமக்கள் எம்எல்ஏ., அலுவலகத்திற்கு வந்து செல்வது வழக்கம்.

ஆனால், கடந்த இரு நாட்கள் வார நாட்கள் விடுமுறை என்பதால், எம்எல்ஏ., உட்பட அலுவலர்கள் யாரும் செல்லவில்லை. இந்நிலையில், நேற்று எம்எல்ஏ., அலுவலக வளாகத்தில் கடும் துர்நாற்றம் வீசியது. அலுவலகத்திற்கு வந்தவர்கள் அங்கு சென்று பார்த்த போது, சுமார் 70 வயது மதிக்கத்தக்க முதியவர் ஒருவர் பிணமாக கிடப்பது தெரியவந்துள்ளது.

இதுகுறித்து, ஊட்டி நகர போலீசாருக்கு தகல் அளித்தனர். அதன்பேரில், இன்ஸ்பெக்டர் சிவகுமார் தலைமையிலான போலீசார் சம்பவ இடத்திற்கு சென்று ஆய்வு நடத்தி முதியவரின் உடலை மீட்டு பிரேத பரிசோதனைக்காக ஊட்டி அரசு மருத்துவமனைக்கு அனுப்பி வைத்தனர். முதியவர் ஒருவர் எம்எல்ஏ அலுவலகத்தில் இறந்து கிடந்த சம்பவம் ஊட்டியில் பரபரப்பை ஏற்படுத்தியது.