சென்னையில் வணிகப் பயன்பாட்டிற்கான சிலிண்டர் விலை ரூ.34.50 குறைந்து ரூ.1,789க்கு விற்பனை!

சென்னை: சென்னையில் வணிகப் பயன்பாட்டிற்கான சிலிண்டர் விலை ரூ.34.50 குறைந்து ரூ.1,789க்கு விற்பனை செய்யப்படுகிறது. வீட்டு உபயோக சிலிண்டர் விலையில் மாற்றமின்றி ரூ.868.50க்கு விற்பனையாகிறது. பாரத், இந்துஸ்தான், இந்தியன் ஆயில் ஆகிய பொதுத்துறை எண்ணெய் நிறுவனங்கள் வீடுகளுக்கு 14.20 கிலோ எடையிலும், வணிக பயன்பாட்டுக்கு 19 கிலோ எடையிலும், சமையல் கியாஸ் சிலிண்டர்களை நாடு முழுவதும் வினியோகம் செய்து வருகின்றன. சர்வதேச சந்தையில் கச்சா எண்ணெயின் விலை மற்றும் அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றைக் கணக்கில் கொண்டு எண்ணெய் நிறுவனங்கள் பெட்ரோல், டீசல் மற்றும் சமையல் கியாஸ் சிலிண்டர்களின் விலைகளை நிர்ணயித்து வருகின்றன. இதில் சமையல் கியாஸ் சிலிண்டர்களின் விலைகளை மாதத்தின் முதல் தேதியில் மாற்றி அமைத்து வருகிறது.

அந்த வகையில், இந்த மாதம், எண்ணெய் நிறுவனங்கள் வெளியிட்டுள்ள அறிவிப்பின்படி, வணிக பயன்பாட்டு சிலிண்டரின் விலை குறைந்துள்ளது. இந்நிலையில், சென்னையில் வணிக பயன்பாட்டிற்கான சிலிண்டரின் விலை ரூ.34.50 குறைந்து ரூ.1,789-க்கு விற்பனை செய்யப்படுகிறது. வீட்டு உபயோக சிலிண்டர் விலை எந்தவித மாற்றமுமின்றி ரூ.868.50-க்கு விற்பனை செய்யப்படுகிறது. கடந்த டிசம்பரில் ரூ.1,980-க்கு விற்பனை செய்து வந்த வணிக பயன்பாடு சிலிண்டர், தற்போது ரூ.201 வரை குறைந்து ரூ.1,789-க்கு விற்பனை செய்யப்படுகிறது. நடப்பாண்டில் மார்ச் மாதம் மட்டும் ரூ.5.50 அதிகரித்து இருந்தது. மற்ற மாதங்களில் விலை குறைந்து விற்பனையானது குறிப்பிடத்தக்கது.