அமித்ஷாவின் பேச்சுக்கு ஏற்ப செயல்படும் தேர்தல் ஆணையம்: காதர் மொகிதீன் குற்றச்சாட்டு

தஞ்சாவூர்: தஞ்சாவூரில் இந்திய யூனியன் முஸ்லிம் லீக் கட்சி தேசிய தலைவர் காதர் மொகிதீன் நேற்று நிருபர்களுக்கு அளித்த பேட்டி: பீகார் மாநிலத்தில் வாக்காளர் பட்டியலில் இருந்து லட்சக்கணக்கான பெயர்கள் நீக்கம் செய்யப்படுவது ஜனநாயகத்திற்கு எதிரானது. சில நாட்களுக்கு முன்பு மத்திய உள்துறை அமைச்சர் அமித்ஷா, எங்கள் திட்டப்படி தான் தேர்தல் நடைபெறும் என தெரிவித்துள்ளார்.

அவரது பேச்சுக்கு தகுந்தாற்போல் இந்திய தேர்தல் ஆணையம் செயல்படுகிறது. தேர்தல் ஆணையம் இந்திய அரசியல் சட்டப்படி நடந்து கொள்ள வேண்டும். பீகாரில் நடைபெறும் இந்த நடைமுறை, அந்த மாநிலத்தோடு மட்டும் நிற்காது. இந்தியா முழுவதும் நடைமுறைப்படுத்தப்படும். தேர்தல் ஆணையத்தின் இந்த நடைமுறையை உயிர் தியாகங்கள் செய்து தடுத்து நிறுத்த மக்கள் தயாராக உள்ளனர். இவ்வாறு அவர் கூறினார்.