வனப்பகுதிக்குள் கற்களை திருட முயன்ற 7 பேர் அதிரடி கைது

ஊட்டி : ஊட்டி வென்லாக் டவுன் வனப்பகுதியில் அத்துமீறி உள்ளே நுழைந்து கற்களை உடைத்து திருட முயன்ற 7 பேரை வனத்துறையினர் கைது செய்தனர்.ஊட்டி வடக்கு வனச்சரகத்திற்கு உட்பட்ட வென்லாக் டவுன் காப்பு காட்டிற்குட்பட்ட எச்பிஎப் பகுதியில் நேற்று முன்தினம் இரவு சிலர் கற்களை உடைப்பதாகவும், மண்ணை எடுத்து செல்வதாகவும் வனத்துறையினருக்கு தகவல் கிடைத்துள்ளது. அதன்பேரில், வடக்கு வனசரகத்திற்குட்பட்ட வன ஊழியர்கள் அங்கு சென்று சோதனை நடத்தினர்.

அப்போது, ஊட்டி தலை குந்தா பகுதியை சேர்ந்த வெங்கடேஷ் (43), நாகராஜ் (32), சந்தோஷ் (31), ஈஸ்வரன் (34), கல்லட்டி பகுதியை சேர்ந்த சுரேஷ் (49), ஆகியோர் வனப்பகுதிக்குள் கற்களை உடைத்தும், அங்கிருந்த மண்ணையும் எடுத்து செல்ல முயற்சித்தது தெரிய வந்தது. இதனைத் தொடர்ந்து அவர்கள் 5 பேரையும் வனத்துறையினர் கைது செய்து நீதிமன்றத்தில் ஆஜர் படுத்தி சிறையில் அடைத்தனர்.

இதேபோன்று, எச்பிஎப் வனப்பகுதியில் கற்களை உடைத்த ஊட்டி வீசி காலனி பகுதியை சேர்ந்த பிரதீப் குமார் (32), காந்தல் பகுதியை சேர்ந்த அகமதுல்லா (32), ஆகியோரையும் வனத்துறையினர் கைது செய்து சிறையில் அடைத்தனர். மேலும் இவர்களுடன் அத்துமீறி வனத்திற்குள் சென்று கற்களை உடைத்த மூன்று பேர் தப்பி விட்டனர். அவர்களையும் வனத்துறையினர் தேடி வருகின்றனர்.