20 ஆண்டுகளுக்கும் மேலான வாகன பதிவு புதுப்பித்தல் கட்டணம் கடும் உயர்வு: ஒன்றிய அரசு அதிரடி

புதுடெல்லி: டெல்லியில் 10 ஆண்டுகளுக்கு மேலான டீசல் வாகனங்களையும், 15 ஆண்டுகளுக்கு மேலான பெட்ரோல் வாகனங்களையும் நீக்க ஒன்றிய அரசு நடவடிக்கை எடுத்தது. இதற்கு உச்ச நீதிமன்றம் தடை விதித்தது. இதையடுத்து 20 ஆண்டுகளுக்கும் மேலான இலகுரக மோட்டார் வாகனங்களுக்கான புதுப்பித்தல் கட்டணம் ரூ.5,000 லிருந்து ரூ.10,000 ஆக இரட்டிப்பாக்கப்பட்டுள்ளதாக சாலைப் போக்குவரத்து மற்றும் நெடுஞ்சாலைகள் அமைச்சகம் அறிவித்து உள்ளது. அதே போல் 20 ஆண்டுகளுக்கு மேலான மோட்டார் சைக்கிள்களுக்கு, புதுப்பித்தல் கட்டணம் ரூ.1,000 லிருந்து ரூ.2,000 ஆக உயரும். மூன்று சக்கர வாகனங்கள் மற்றும் குவாட்ரிசைக்கிள்களுக்கு புதுப்பித்தல் கட்டணம் ரூ.3,500 லிருந்து ரூ.5,000 ஆக அதிகரிக்கும். இறக்குமதி செய்யப்பட்ட இரண்டு அல்லது மூன்று சக்கர வாகனங்களைப் பொறுத்தவரை, பதிவுச் சான்றிதழைப் புதுப்பிப்பதற்கான செலவு ரூ.20,000 ஆகவும், நான்கு அல்லது அதற்கு மேற்பட்ட சக்கரங்களைக் கொண்ட இறக்குமதி செய்யப்பட்ட வாகனங்களுக்கு ரூ.80,000 ஆகவும் இருக்கும் என்று தெரிவிக்கப்பட்டுள்ளது.