2025 காரீப் பருவத்தில் விவசாயிகளுக்கு போதுமான யூரியா கிடைப்பது உறுதி: ஒன்றிய உரத்துறை தகவல்

புதுடெல்லி: இந்திய ரயில்வே, துறைமுகங்கள், மாநில அரசுகள் மற்றும் உர நிறுவனங்கள் போன்ற பல்வேறு பங்குதாரர்களுடன் இணைந்து மேற்கொள்ளப்பட்ட சரியான திட்டமிடல் மற்றும் ஒருங்கிணைப்பு மூலம், விவசாயிகள் தேவையான அளவு யூரியாவைப் பெறுவதை ஒன்றிய அரசு உறுதி செய்துள்ளது. வேளாண்மை மற்றும் விவசாயிகள் நலத்துறையால் மதிப்பிடப்பட்ட 185.39 லட்சம் மெட்ரிக் டன் தேவைக்கும் அதிகமாக உரத் துறையால் உறுதி செய்யப்பட்ட கிடைக்கும் தன்மை 230.53 லட்சம் மெட்ரிக் டன்னாக அதிகரிக்கப்பட்டுள்ளது. இது நாடு முழுவதும் போதுமான அளவு யூரியா கிடைப்பதை பிரதிபலிக்கிறது.

2025 ஏப்ரல் மற்றும் அக்டோபர் மாதங்களுக்கு இடையில், இந்தியா 58.62 லட்சம் மெட்ரிக் டன் விவசாய தர யூரியாவை இறக்குமதி செய்தது. இது முந்தைய ஆண்டின் இதே காலகட்டத்தில் 24.76 லட்சம் மெட்ரிக் டன்னாக இருந்தது. 2025 ஜூலை முதல் அக்டோபர் வரையிலான மாதங்களில் அதிக அளவிலான யூரியா மாநிலங்களுக்கு விநியோகம் செய்யப்பட்டுள்ளது. உள்நாட்டு யூரியா உற்பத்தியும் முன்னேற்றத்தைக் கண்டுள்ளது, அக்டோபர் 2025ல் உற்பத்தி 26.88 லட்சம் மெட்ரிக் டன்களை எட்டியுள்ளது, இது கடந்த ஆண்டு இதே மாதத்துடன் ஒப்பிடும்போது 1.05 லட்சம் மெட்ரிக் டன் அதிகமாகும். ஏப்ரல்-அக்டோபர் மாதங்களுக்கு இடையிலான சராசரி மாதாந்திர உற்பத்தி கிட்டத்தட்ட 25 லட்சம் மெட்ரிக் டன்னாக இருந்தது. மேலும், நவம்பர் மற்றும் டிசம்பர் மாதங்களுக்கான இறக்குமதி சுமார் 17.5 லட்சம் மெட்ரிக் டன்னாக தயாராக உள்ளது.