பிறப்பு முதல் 5 வயது வரை…

நன்றி குங்குமம் டாக்டர்

குழல் இனிது... யாழ் இனிது!

சென்ற வாரத் தொடர்ச்சி…

விளையாட்டு

இளம் குழந்தைகளின் ஆரோக்கியத்திற்கும் வளர்ச்சிக்கும் உடல் செயல்பாடு (பிசிக்கல் ஆக்டிவிடிஸ்) மிகவும் அவசியம். அந்தவகையில் 1-5 வயது வரை உள்ள குழந்தைகள் தினமும் 3 மணி நேரம் விளையாட வேண்டியது அவசியமானது.

விளையாடுவதால் ஏற்படும் நன்மைகள்

*குழந்தைகள் ஆரோக்கியமான உடல் எடையை பராமரிக்க உதவுகிறது.

*குழந்தைகளின் எலும்புகள், தசைகள், நுரையீரல் மற்றும் இதயத்தை வலுப்படுத்துகிறது.

*குழந்தைகளின் நோய் எதிர்ப்பு சக்தியை அதிகரிக்கிறது.

*குழந்தைகள் வெற்றி, தோல்வியை சமமாக பார்க்கும் தன்மை ஏற்படுகிறது. மற்ற குழந்தைகளுடன் சேர்ந்து விளையாடும்போது சமூகத்துடன் பிணைப்பு ஏற்படுகிறது.

*சுயக்கட்டுப்பாட்டை கற்றுக் கொள்கிறார்கள்.

*பெரியவர்களாகும்போது ஏற்படும் உயர் ரத்த அழுத்தம், நீரிழிவு நோய், உடல் பருமன், பதட்டம், மனச்சோர்வு போன்ற உடல் நல கோளாறு கள் வராமல் தடுக்கப்படுகிறது.

*தன்னம்பிக்கை அதிகரிக்கிறது.

*பசி உணர்வை நன்றாக தூண்டிவிடுகிறது.

*நன்கு விளையாடும் குழந்தைகள் ஆழ்ந்து தூங்குகின்றனர்.

*குழந்தைகள் நண்பர்களுடன் சேர்ந்து விளையாடுவதால் தொலைக்காட்சி, கைப்பேசியை அதிக நேரம் பார்ப்பது தவிர்க்கப்படுகிறது.

திரைநேரம்

*0-2 வயது வரை - அலைபேசி, தொலைக்காட்சி போன்றவற்றை குழந்தைகள் பார்ப்பதை முற்றிலும் தவிர்க்க வேண்டும்.

*3-5 வயது வரை தினமும் ஒரு மணி நேரம் மட்டுமே திரை நேரம் ஒதுக்க வேண்டும்.

*ஒரு மணி நேரத்தில் பார்க்க வேண்டியவற்றை பெற்றோர் தேர்ந்தெடுக்க வேண்டும்.

*கல்வி சம்பந்தமான விஷயங்களை பார்க்க அனுமதிக்கலாம்.

அதிகமான திரை நேரத்தால் ஏற்படும் உடல்நல பிரச்னைகள்

*உடல் பருமன்

*போதுமான தூக்கமின்மை

*நடத்தை பிரச்னைகள்

*பேச்சு தாமதமாதல்

*ஆட்டிசம்

*கவனச்சிதறல்கள்

*பெற்றோர் குழந்தைகள் திரைநேரம் செலவிடுவதை கண்காணித்து கட்டுப்படுத்த வேண்டும்.

*அவர்களுக்கு வெளியில் சென்று நண்பர்களுடன் விளையாடும் வாய்ப்பை ஏற்படுத்தி கொடுக்க வேண்டும்.

*பாட்டு பாடுவது, நடனம் ஆடுவது, ஓவியம் வரைவது போன்ற செயல்கள் திரைநேரத்தை குறைக்க மிகவும் உதவும்.

வளர்ச்சி மைல்கற்கள்

*12 மாதங்கள் - தனியாக நிற்க ஆரம்பிக்கும் கையைப் பிடித்துக் கொண்டு நடக்க ஆரம்பிக்கும்.

*அப்பா, அம்மா போன்ற வார்த்தைகளை பேச ஆரம்பிக்கும்.

*ஆள்காட்டி விரலால் பொருட்களை சுட்டிக்காட்டும்.

*18 மாதங்கள் - ஒரு கையால் பிடித்துக் கொண்டு படிக்கட்டுகளில் எழுவார்கள்.

*தானாக எடுத்து சாப்பிட ஆரம்பிப்பார்கள்.

*உடல் பாகங்களை சுட்டிக் காட்ட ஆரம்பிப்பார்கள்.

2 வயது நன்றாக ஓடி விளையாடுவார்கள். அவர்களால் பந்தை உதைத்து விளையாட முடியும்.

2-3 வார்த்தைகளை சேர்த்து பேச தொடங்குவார்கள்.

*தாகம், பசி ஆகியவற்றை சொல்ல ஆரம்பிப்பார்கள்.

*கழிவறைக்கு செல்ல வேண்டியதை அவர்களால் சொல்ல முடியும்.

3 வயது

*மூன்று சக்கர மிதிவண்டி ஓட்டும் அளவு வலிமை இருக்கும்.

*படிக்கட்டுகளில் ஏறுவார்கள்

*தன்னுடைய பெயர், வயது, பாலினம் சொல்லத் தெரிந்து கொள்வர்.

4 வயது

*ஒற்றைக் காலில் குதிக்க முடியும். 4 -5 வார்த்தைகள் கொண்ட வாக்கியத்தை பேச தொடங்குவார்கள்.

*சுலபமான எளிய பாடல்களை பாடத் தொடங்குவர்.

5 வயது

*குதிப்பது, தாவுவது போன்றவற்றை எளிதாக அவர்களால் செய்ய முடியும்.

*கேள்விகள் கேட்க தொடங்குவர்.

*கற்பனைத் திறனுடன் விளையாடுவர்

*கதை சொல்லுவர்.

செயல்பாடுகள்

*12 மாதங்களில் - படங்கள் உள்ள புத்தகங்களை காண்பித்து அவற்றின் பெயர்களை சொல்லிக் கொடுக்கலாம்.

*வெளியே அழைத்துச் சென்று வெளி உலகை பற்றி சொல்லிக் கொடுக்கலாம்.

*விளையாடவும், நடக்கவும் ஊக்குவிக்கலாம்.

*18 மாதங்களில் - குழந்தைக்கு கதைகள் சொல்ல தொடங்கலாம்.

*படங்களை சுட்டிக்காட்டி அவற்றின் பெயர்களை கொடுக்கலாம்.

*பேனா பிடித்து தாளில் கோடுகள் வரைய கற்றுத் தரலாம்.

*ஒரே வயது உடைய குழந்தைகளுடன் விளையாடச் செய்யலாம்.

2 வயது செயல்பாடுகள்

*குழந்தைகள் சுறுசுறுப்பாக விளையாட வாய்ப்பை ஏற்படுத்திக் கொடுக்க வேண்டும்.

*அவர்களின் படைப்பாற்றலை மேம்படுத்தும் விதமாக விளையாட்டு பொருட்களை கொடுத்து விளையாடச் செய்யலாம்.

*தொலைக்காட்சி, அலைபேசி கொடுப்பதை முற்றிலும் தவிர்க்க வேண்டும்.

3-5 வயது செயல்பாடுகள்

*குழந்தையுடன் சேர்த்து நீங்களும் விளையாடுங்கள்.

*கதைகள் சொல்லிக் கொடுங்கள்.

*ஓவியம் வரைவது, பாடல் பாடுவது, களிமண்ணில் பொம்மைகள் செய்வது போன்ற செயல்களில் குழந்தைகளை ஈடுபடச் செய்ய வேண்டும்.

*குழந்தையை மற்ற குழந்தையுடன் விளையாட ஊக்குவிக்க வேண்டும்.

*குழந்தை உடல் ரீதியாக சுறுசுறுப்பாக இருக்க போதுமான இடத்தை வழங்குதல் வேண்டும்.

*வீட்டில் சின்ன சின்ன வேலைகளை பெற்றோருடன் சேர்ந்து செய்ய பழக்க வேண்டும்.

*தடுப்பூசிகள்

*தட்டம்மை

*தொண்டை அடைப்பான்

*ரணஜன்னி

*கக்குவான்

*சின்னம்மை

*மண்ணாங்கட்டி அம்மை

*ரூபெல்லா

*ஹெபடைடிஸ்

*டைபாய்டு

*போலியோ

*ஆகிய நோய்களுக்கு தடுப்பூசிகள் 1 முதல் 5 வயது வரையிலான குழந்தைகளுக்கு கொடுக்கப்பட வேண்டும்.

*இந்த வயது குழந்தைகள் துறுதுறுவென இருப்பதால் இவர்களை பெற்றோர் மிகுந்த கவனத்துடன் பார்த்துக் கொண்டால் அவர்கள் எந்தவொரு ஆபத்திலும் சிக்காமல் தவிர்க்கலாம்.

தொகுப்பு: ஸ்ரீதேவி