அலர்ஜியில் இத்தனை வகைகளா?

நன்றி குங்குமம் டாக்டர்

பொதுநல மருத்துவர் சுதர்சன் சக்திவேல்

இன்றைய நவீன வாழ்க்கை முறையில், அலர்ஜி என்பது குழந்தைகளிலிருந்து முதியோர் வரை யாரையும் விட்டு வைக்காத ஒரு பொதுவான சுகாதார சவாலாக மாறியுள்ளது. “அலர்ஜி” என்ற சொல்லுக்கு பொருள், உடலுக்கு பாதிப்பு தரக்கூடிய பொருட்களுக்கு எதிராக, உடலின் பாதுகாப்பு மண்டலமான ‘இம்யூன் சிஸ்டம்’ செயல்படுவதை குறிக்கும்.

அலர்ஜியை தூண்டும் காரணிகள் பலவகையாக இருக்கின்றன. தூசி, மலர் தூள் (pollen), செல்லப்பிராணிகளின் முடி, சில உணவுப் பொருட்கள் (பால், பருப்பு, கடல் உணவுகள்), மருந்துகள் போன்றவை முக்கியமானவை. இவை உடலில் நுழைந்தவுடன் ஹிஸ்டமின், செரட்டோனின் போன்ற ரசாயனங்கள் வெளிப்பட்டு, தும்மல், மூக்கு வடிதல், கண்களில் நீர் வடிதல், சரும அரிப்பு, சுவாசக்குறைவு போன்ற அறிகுறிகளை உருவாக்குகின்றன.

இன்றைய காலத்தில் அலர்ஜி நோய்கள் குழந்தைகள், பெரியவர்கள் என அனைவரையும் பாதித்து வருகின்றது. குறிப்பாக இந்தியாவில் காலநிலை மாற்றம், தூசி, சுற்றுசூழல் மாசு, வாழ்க்கை முறை மாற்றங்கள் ஆகியவை காரணமாக அலர்ஜி நோய்கள் ஆண்டுதோறும் அதிகரித்து வருகின்றன.

பொதுவாகக் காணப்படும் முக்கியமான அலர்ஜி கோளாறுகள்:

அலர்ஜிக் ரைனைட்டிஸ் - தூசி, மலர் தூள் காரணமாக ஏற்படும் தும்மல், மூக்கடைப்பு.

ஆஸ்துமா (Asthma) - சுவாசக் குழாய்களில் அலர்ஜி காரணமாக ஏற்படும் மூச்சுத் திணறல்.

அடோபிக் டெர்மடைட்டிஸ் (Eczema) - தோலில் அரிப்பு, சிவப்பு அலர்ஜி.

உணவு அலர்ஜி (Food Allergy) - பால், முட்டை, பருப்பு, கடல் உணவுகள் போன்றவற்றால் ஏற்படும் உடனடி பாதிப்பு.

மருந்து அலர்ஜி (Drug Allergy) - சில மருந்துகளால் ஏற்படும் தோல் அலர்ஜி , மூச்சுத் திணறல் போன்ற பிரச்னைகள்.

அலர்ஜிக் கஞ்சங்க்டைவிடிஸ் (Allergic Conjunctivitis) - கண்களில் சிவப்பு, நீர் வடிதல், அரிப்பு.

சுற்றுப்புற மற்றும் வேலை இட அலர்ஜி - தூசி, மாசு, ரசாயனங்கள், தொழிற்சாலை தூள் போன்றவற்றால் ஏற்படும் சுவாச/தோல் பிரச்னைகள்.

அனபைலக்சிஸ் (Anaphylaxis) - மிகக் கடுமையான, உயிருக்கு ஆபத்தான உடனடி அலர்ஜி எதிர்வினை.

உலகளவில் அலர்ஜி நோய்களின் பரவல் அதிகரித்து வருவதால், இது ஒரு பொதுச் சுகாதார பிரச்னை எனக் கருதப்படுகிறது. தவறான நகர்ப்புற வாழ்க்கை, காற்று மாசுபாடு, மரபணு காரணிகள் ஆகியவை இதில் பங்கு வகிக்கின்றன. சரியான பரிசோதனை மற்றும் மருத்துவர் ஆலோசனை, தேவையான மருந்துகள் (அந்தி-ஹிஸ்டமின், இன்ஹேலர்கள்) ஆகியவை சிகிச்சையில் முக்கிய பங்கு வகிக்கின்றன. அலர்ஜி என்பது அசாதாரணமான ஒன்று அல்ல. ஆனால் சரியான விழிப்புணர்வு, வாழ்க்கை முறையில் மாற்றங்கள், தகுந்த சிகிச்சை ஆகியவற்றின் மூலம் எளிதாக கட்டுப்படுத்தக்கூடிய ஒரு நிலையாகும்.

அலர்ஜிக் ரைனைட்டிஸ்

அலர்ஜிக் ரைனைட்டிஸ் (Allergic Rhinitis) என்பது உலகம் முழுவதும் பரவலாகக் காணப்படும் ஒரு அலர்ஜி நோயாகும். இந்தியாவில் மட்டும் சுமார் 20-30% மக்களுக்கு இந்த பிரச்சினை உள்ளது என ஆய்வுகள் தெரிவிக்கின்றன. இது பொதுவாக “தும்மல் காய்ச்சல்” (Hay Fever) என்ற பெயராலும் அழைக்கப்படுகிறது.

அலர்ஜிக் ரைனைட்டிஸ் என்றால் என்ன?

மூக்குக் குழாய்கள் மற்றும் மேல்சுவாச பாதையில், தூசி, மலர் தூள் (pollen), செல்லப்பிராணிகளின் முடி, பூஞ்சை துகள்கள் போன்ற அலர்ஜி பொருட்கள் நுழையும்போது, உடலின் இம்யூன் சிஸ்டம் அவற்றை விரோதிகள் எனக் கருதி அதிகப்படியான எதிர்வினை கொடுக்கும். இதன் விளைவாக ஹிஸ்டமின் போன்ற ரசாயனங்கள் வெளிப்பட்டு, மூக்கு அடைப்பு, தும்மல், மூக்கில் நீர் வடிதல், கண்களில் நீர் வருதல் போன்ற அறிகுறிகள் தோன்றுகின்றன.

முக்கிய அறிகுறிகள்

*அடிக்கடி தும்மல் வருதல்

*மூக்கடைப்பு அல்லது அதிக நீர் வடிதல்

*கண்களில் அரிப்பு, சிவப்பு, நீர் வடிதல்

*தொண்டை அரிப்பு அல்லது வலி

*தலைவலி, சோர்வு, தூக்கக்குறைவு

இந்த அறிகுறிகள் காலநிலையைப் பொறுத்து மாறுபடும். சிலருக்கு குறிப்பிட்ட பருவத்தில் (seasonal rhinitis - pollen allergy) மட்டும் வரும், சிலருக்கு ஆண்டுதோறும் தொடர்ந்து (perennial rhinitis - dust mites, pets) காணப்படும்.

காரணிகள்

1. மலர் தூள் (Pollen) - இந்தியாவின் வசந்த, கோடை பருவங்களில் அதிகம்.

2. வீட்டு தூசி (House dust) - நகர்ப்புறங்களில் முக்கியமான காரணம்.

3. செல்லப்பிராணிகள் - நாய், பூனை முடி, உமிழ்நீர்.

4. பூஞ்சை துகள்கள் (Molds) - ஈரப்பதம் அதிகமான இடங்களில்.

5. சுற்றுப்புற மாசுபாடு - தொழிற்சாலை, வாகன புகை.

அபாயக் காரணிகள்

*குடும்பத்தில் அலர்ஜி/ஆஸ்துமா (Family history)

*நகர்ப்புறத்தில் வாழ்வு (pollution exposure)

*புகைபிடித்தல்

*குழந்தைகளில் அதிக தூசி/பூஞ்சை தொடர்பு.

விளைவுகள்

அலர்ஜிக் ரைனைட்டிஸ் உயிருக்கு ஆபத்தானது அல்ல. ஆனால் வாழ்க்கை தரம் கடுமையாக பாதிக்கப்படுகிறது. தூக்கமின்மை, தொடர்ந்து சோர்வு, படிப்பு/வேலை திறன் குறைவு, குழந்தைகளில் கவனக்குறைவு பிரச்னைகள் போன்றவை ஏற்படலாம். சிலருக்கு நீண்டகாலத்தில் சைனஸைட்டிஸ், காதில் திரவம் தேங்குதல், ஆஸ்துமா போன்ற சிக்கல்களும் உருவாகக்கூடும்.

கண்டறிதல் எப்படி?

மருத்துவரிடம் விரிவான வரலாறு, உடற் பரிசோதனை மூலம் முதன்மையாக நோயை அறிந்து கொள்ளலாம். மருத்துவ ஆலோசனையுடன்,ஸ்கின் ப்ரிக் டெஸ்ட்(Skin prick test),இம்யூனோகுளோபுலின் E (IgE) அளவு பரிசோதனை, போன்ற பரிசோதனைகள் மூலம் காரணியை உறுதிப்படுத்தலாம்.

சிகிச்சை (உரிய மருத்துவ ஆலோசனையுடன்)

1.அலர்ஜி தூண்டும் பொருட்களை தவிர்த்தல் - தூசி, செல்லப்பிராணிகள், மலர் தூள் ஆகியவற்றை தவிர்க்கவும்.

2.மருந்துகள்:

* அந்தி-ஹிஸ்டமின் மாத்திரைகள்

* மூக்கு ஸ்ப்ரே (Nasal corticosteroids)

* டிகாங்ஜெஸ்டன்ட் (Decongestants)

3. இம்யூனோத்தெரபி (Allergen Immunotherapy)- அலர்ஜி தூண்டுபொருட்களுக்கு எதிராக மெதுவாக உடலை பழக்கப்படுத்தும் சிகிச்சை (allergy shots / tablets).

4. வாழ்க்கை முறை மாற்றங்கள். ( காரணிகளைத் தவிர்த்தல்)

முடிவுரை

அலர்ஜிக் ரைனைட்டிஸ் என்பது சாதாரணமாக தோன்றினாலும், வாழ்க்கைத் தரத்தை பெரிதும் பாதிக்கும் நீண்டகால பிரச்னையாகும். இந்தியாவில் அதிகரித்து வரும் மாசுபாடு, தூசி, காலநிலை மாற்றங்கள் காரணமாக இதன் பரவல் உயரும் நிலையில் உள்ளது. சரியான பரிசோதனை, தகுந்த சிகிச்சை மற்றும் வாழ்க்கை முறை மாற்றங்கள் மூலம் இந்த நோயை நன்கு கட்டுப்படுத்த முடியும்.