சரவணம்பட்டியில் நடந்த ‘உங்களுடன் ஸ்டாலின்’ முகாமில் 2 ஆயிரம் மனுக்கள் குவிந்தன

கோவை, ஜூலை 26: தமிழ்நாடு அரசின் சேவைகள் பொதுமக்களுக்கு எளிதாக கிடைத்திடும் வகையில் அவர்கள் இருப்பிடத்திற்கே சென்று மனுக்கள் வாங்கி தீர்வு காண ‘உங்களுடன் ஸ்டாலின்’ என்ற திட்டம் துவங்கப்பட்டுள்ளது.

இந்த முகாமில் நகர்ப்புற பகுதிகளில் 13 துறைகளில் 43 சேவைகளும், கிராமப்புறத்தில் 15 துறைகளில் 45 சேவைகளும் மனு மூலம் தீர்வு காணப்படுகிறது. இதேபோல், நேற்று சரவணம்பட்டி பகுதியில் உள்ள தனியார் மண்டபத்தில் உங்களுடன் ஸ்டாலின் திட்ட முகாம் நடந்தது. இதில் 4 மற்றும் 10 வது வார்டு பகுதிகளை சேர்ந்த பொதுமக்கள் ஆர்வமுடன் கலந்து கொண்டனர். சரவணம்பட்டி, ரெவின்யூ நகர், சின்ன மேட்டுப்பாளையம், கீரணத்தம் ரோடு, கார்த்திக் நகர், அம்மன் நகர், பெரியார் நகர் உள்ளிட்ட பகுதிகளை சேர்ந்த 2 ஆயிரம் பேர் மனு அளித்தனர். அதில், புதிய ஆதார் கார்டு, பெயர் மாற்றம், பிறப்பு, இறப்பு சான்றிதழ், உள்ளிட்டவை கோரி பல்வேறு மனுக்கள் அளிக்கப்பட்டது.

குறிப்பாக மகளிர் உரிமை கோரி 980 மனுக்கள் குவிந்தன. மனு அளித்தவர்களில் சில பயனாளிகளுக்கு உடனடி தீர்வு எட்டப்பட்டு, சான்றிதழ்களை மாநகராட்சி மேயர் ரங்கநாயகி வழங்கினார். உடன் வடக்கு மண்டல தலைவர் கதிர்வேல், உதவி ஆணையர் முத்துசாமி, உதவி செயற்பொறியாளர் முத்துக்குமார் மற்றும் உதவி நகரமைப்பு திட்டமிடுனர் சத்யா உள்ளிட்ட பலர் கலந்து கொண்டனர்.