நரிக்குடி அருகே மின் கம்பி மீது விழுந்து கணவன், மனைவி காயம்

திருச்சுழி. டிச.1: நரிக்குடி அருகே உள்ள அரசகுளத்தைச் சேர்ந்தவர் கார்த்திக் (32). இடையப்பட்டி கிராமத்தில் குடும்பத்துடன் தங்கி விவசாயம் செய்து வருகிறார். இந்நிலையில் அவர் தனது டூவீலரில், மனைவி கார்த்தீஸ்வரியுடன் (26) வெங்காய அறுவடை பணிகளை முடித்து விட்டு இரவில் வீடு திரும்பிக் கொண்டிருந்தார். ஆவாரங்குளம்-இடையப்பட்டி சாலையில் வந்தபோது, அப்பகுதியை சேர்ந்த விவசாயி காட்டுப்பன்றிக்காக மின்வேலி அமைத்திருந்ததாகவும், அது அறுந்து பாதையில் கிடந்ததாகவும் கூறப்படுகிறது.

இதை கவனிக்காத கார்த்திக், அறுந்து கிடந்த கம்பியின் மீது டூவீலரை ஏற்றிய போது திடீரென மின்சாரம் பாய்ந்து இருவரும் சாலையில் தூக்கி வீசப்பட்டனர். இதில் காயம் அடைந்த கார்த்திக் படுகாயமடைந்தார். மேலும் இவரது மனைவி லேசான காயமடைந்தார். இதையடுத்து காயமடைந்த கார்த்திக், அ.முக்குளம் அரசு மருத்துவமனையில் முதலுதவி சிகிச்சை அளிக்கப்பட்டது. இதன் பின்னர், மேல்சிகிச்சைக்காக மதுரை அரசு மருத்துவமனைக்கு அனுப்பி வைக்கப்பட்டார். இதுகுறித்து அ.முக்குளம் போலீசார் விசாரணை நடத்தி வருகின்றனர்.