களக்காடு அருகே தெரு நாய்கள் கடித்து 5பேர் காயம்

களக்காடு,ஆக.13: களக்காடு நகராட்சி பகுதியில் தெருநாய்கள் தொல்லை அதிகரித்து வருகிறது. இந்நிலையில் களக்காடு அருகே உள்ள எஸ்.எஸ்.பள்ளிவாசலை சேர்ந்த பெருமாள் மகன் சரண்ராஜ் (26), பறையன்குளத்தை சேர்ந்த திருமலை (40), மூதாட்டி தங்கத்தாய் (70), சுவாமிநாதம் மகன் பசுபதி (47), கீழப்பத்தையை சேர்ந்த ராமன் மகன் திருமலைநம்பி (50) ஆகிய 5 பேர் தெரு நாய்கள் கடித்து படுகாயமடைந்து, களக்காடு அரசு மருத்துவமனையில் அனுமதிக்கப்பட்டுள்ளனர். அவர்களுக்கு தீவிர சிகிச்சை அளிக்கப்பட்டு வருகிறது. இதேபோல் களக்காடு புதுத்தெருவை சேர்ந்த அரவிந்த் மனைவி ரம்யா (24). இவர் நேற்று வீட்டில் இருந்த போது பக்கத்து வீட்டில் வளர்க்கப்படும் நாய் அவரை வீடு புகுந்து கடித்து குதறியது. இதில் படுகாயமடைந்த அவரும் களக்காடு அரசு மருத்துவமனையில் சேர்க்கப்பட்டு, சிகிச்சை பெற்று வருகிறார். களக்காடு பகுதியில் தெரு நாய்களின் தொல்லையை கட்டுப்படுத்த வேண்டும் என்றும், வீடுகளில் வளர்க்கப்படும் நாய்களையும் தெருவில் சுற்ற விடாமல் தடுக்க நாய்களின் உரிமையாளர்கள் மீதும் நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர்.