நெல்லை, தென்காசி மாவட்ட மலையடிவார பகுதியில்விளைநிலங்களுக்குள் அடிக்கடியானைகள் புகுவதால் விவசாயிகள் அச்சம்

நெல்லை,டிச.1: நெல்லை, தென்காசி மாவட்ட மலையடிவாரத்தில் உள்ள விளைநிலங்களுக்குள் அடிக்கடி யானைகள் புகுவதால் மக்கள் அச்சமடைந்துள்ளனர். மலையடிவாரத்தில் முகாமிட்டுள்ள யானைகளை வனப்பகுதிக்குள் விரட்ட முடியாமல் வனத்துறை தடுமாறுவதால் ஆயிரக்கணக்கான ஏக்கர் நிலங்கள் பாதிக்கப்பட்டுள்ளது. பஃபர் ஜோனில் கண்காணிப்பை தீவிரப்படுத்த வனத்துறையினரை பொதுமக்கள் வலியுறுத்தியுள்ளனர்.

நெல்லை, தென்காசி மாவட்ட மேற்குத்தொடர்ச்சி மலையடிவார கிராமங்களில் குடியிருப்பு பகுதிகளில் யானைகள் புகும் சம்பவங்கள் அவ்வப்போது நடக்கின்றன. யானைகள், இனப்பெருக்கம், உணவு மற்றும் நீருக்காக ஒரு வனப்பகுதியில் ஒரிடத்தில் இருந்து மற்றொரு இடத்திற்கு பருவகாலங்களுக்கு ஏற்ப இடம் பெயர்வது அவற்றின் இயல்பு. சமீபகாலமாக வனப்பகுதிக்குள் உணவு கிடைப்பதில்லை. இதனால் அவை மலையடிவார குடியிருப்பு பகுதி மற்றும் விளைநிலங்களில் புகுந்து வருவது தொடர் கதையாகி வருகிறது. அங்கே யானைகளுக்கு தேவையான உணவுகள் கிடைப்பதால் அவை மலையடிவாரத்தில் முகாமிட்டுள்ளது.

அவற்றை வனத்துறையினர் விரட்டினாலும் வனப்பகுதிக்குள் செல்லாமல் ஒரு கிராம பகுதியில் இருந்து மற்றொரு கிராம பகுதிக்கு செல்கிறது. இதனால் வனப்பகுதிக்குள் யானைகளை விரட்ட முடியாமல் வனத்துறையினர் தடுமாறி வருகின்றனர். இதனால் யானைகள் விளைநிலங்களில் புகுந்து ஆயிரக்கணக்கான ஏக்கர் பயிர்களை சேதப்படுத்தியுள்ளது. சமீபத்தில் சிவகிரியில் மட்டும் 500 ஏக்கர் வரை பயிர்களை சேதப்படுத்தியுள்ளது. இதையடுத்து சிவகிரி மேற்கு தொடர்ச்சி மலையடிவார பகுதியில் யானைகள் முகாமிட்டுள்ள இடங்களிலும் ட்ரோன் கேமரா மூலம் சிவகிரி சரக வனத்துறையினர் கண்காணித்து வருகின்றனர். கூடுதலாக மற்ற சரகங்களிலும் வனப்பணியாளர்களும் வரவழைக்கப்பட்டுள்ளனர்.