அம்பேத்கர் விருதுக்கு விண்ணப்பிக்கலாம்

திருவள்ளூர், ஆக.29: திருவள்ளூர் மாவட்டத்தில் பட்டியல் இன மக்களுக்கு சேவை புரிந்தவர்கள், டாக்டர் அம்பேத்கர் விருது பெற விண்ணப்பிக்கலாம் என்று கலெக்டர் மு.பிரதாப் தெரிவித்துள்ளார். திருவள்ளூர் மாவட்ட கலெக்டர் மு.பிரதாப் வெளியிட்டுள்ள அறிக்கையில் கூறியிருப்பதாவது: தமிழ்நாட்டில் பட்டியலின மக்களின் வாழ்க்கை முன்னேற்றத்திற்காக பலர் அரிய தொண்டாற்றி வருகிறார்கள். பட்டியல் இன மக்களின் முன்னேற்றத்திற்காக தங்களை இணைத்துக்கொண்டு, அவர்கள் ஆற்றி வரும் அரிய தொண்டுகளை கருத்தில்கொண்டு தமிழ்நாட்டைச் சேர்ந்த ஒருவருக்கு ஆண்டுதோறும் டாக்டர் அம்பேத்கர் விருது வழங்கி, தமிழ்நாடு அரசு சிறப்பித்து வருகிறது. அந்த வகையில், 2025ம் ஆண்டிற்கான தமிழ்நாடு அரசின் டாக்டர் அம்பேத்கர் விருது பெற விரும்புவோர், தங்களை பற்றிய முழு விவரங்களுடன் விண்ணப்பிக்கலாம். திருவள்ளூர் மாவட்ட ஆதிதிராவிடர் மற்றும் பழங்குடியினர் நல அலுவலகத்தில் இவ்விண்ணப்ப படிவத்தினை பெற்று கொள்ளலாம். இவ்வாறு பூர்த்தி செய்யப்பட்ட விண்ணப்பங்கள் வரும் 16ம் தேதிக்குள் திருவள்ளூர் மாவட்ட ஆதிதிராவிடர் மற்றும் பழங்குடியினர் நல அலுவலகத்தில் சமர்ப்பித்து பயன்பெறலாம். இவ்வாறு கூறியுள்ளார்.