நெடுஞ்சாலையில் திரியும் கால்நடைகளால் விபத்து அபாயம்

தேனி, டிச.1: தேனி அருகே ரத்தினம் நகரில் மாநில நெடுஞ்சாலையில் சுற்றித் திரியும் மாடுகளால் விபத்து அபாயம் அதிகரித்துள்ளது. தேனி அருகே ஊஞ்சாம்பட்டி ஊராட்சிக்குட்பட்ட சுக்குவாடன்பட்டி, ரத்தினம் நகர் ஆகிய கிராமங்கள் உள்ளன. தேனி நகரினை ஒட்டியுள்ள இப்பகுதியானது தேனி நகரின் விரிவாக்க நகர் பகுதியாகவே உள்ளது. இதனால் சுக்குவாடன்பட்டி, ரத்தினம் நகர் பகுதிகளில் ஏராளமான புதிய குடியிருப்புகள் உருவாகியுள்ளன. தேனி நகரில் இருந்து பெரியகுளம் சாலை வழியாக பெரியகுளம், திண்டுக்கல் செல்வதற்கான முக்கிய மாநில நெடுஞ்சாலை சுக்வாடன்பட்டி மற்றும் ரத்தினம் நகர் வழியாக செல்கிறது.

பரபரப்பு மிகுந்த இச்சாலையில், சுக்குவாடன்பட்டி மற்றும் ரத்தினம் நகரில் ஏராளமான வீட்டு வளர்ப்பு மாடுகள் சாலையில் கூட்டம் கூட்டமாக திரிகின்றன. இச்சாலையில், இருசக்கர வாகனங்களில் செல்லும் பயணிகளும், நடந்து செல்லும் பயணிகளும் சாலைகளில் சுற்றித் திரியும் மாடுகளை கண்டு அச்சமடையும் நிலை உள்ளது. சில சமயங்களில் மாடுகள் ஒன்றுக்கொன்று முட்டியபடி சாலையில் இங்கும் அங்குமாக செல்வதும் அவ்வழியாக வரும் பயணிகள் மீது பாய்வதுமாக உள்ளது.

மாடுகளைக் கண்டு அச்சம் அடையும் வாகன ஓட்டுனர்கள் தடுமாறியபடி, அப்பகுதியை விட்டு கடந்து செல்லும் அவலம் தொடர்ந்து வருகிறது.சாலைகளில் சுற்றித் திரியும் வளர்ப்பு மாடுகளால் உயிர் பலி ஏற்படுவதற்கு முன்பாக ஊராட்சி நிர்வாகம் மற்றும் நெடுஞ்சாலைத்துறை அதிகாரிகளும் போக்குவரத்து துறை அதிகாரிகளும் உரிய நடவடிக்கை எடுக்க வேண்டுமென பொதுமக்கள் வலியுறுத்தி வருகின்றனர்.