சடலத்தை மயானத்தில் அடக்கம் செய்ய விடாமல் தடுத்த விவசாயி

கெங்கவல்லி, அக்.10: தலைவாசல் அருகே மயானத்தை ஆக்கிரமித்த விவசாயி, இறந்தவரின் சடலத்தை அடக்கம் செய்ய விடாமல் தடுத்ததால் பரபரப்பு ஏற்பட்டது. தலைவாசல் அருகே உள்ள சதாசிவபுரம் கிராமத்தை சேர்ந்த பழனிவேல்(55), என்பவர் உடல் நலக்குறைவால் கடந்த 8ம்தேதி இரவு உயிரிழந்தார். இந்நிலையில், அவரது சடலத்தை அடக்கம் செய்வதற்காக, நேற்று காலை தெடாவூர் சாலையில் உள்ள மயானத்தில் பொக்லைன் மூலம் குழி தோண்டுவதற்காக உறவினர்கள் சென்றனர். அப்போது மயானத்தின் அருகில் லோகநாதன்(62), என்பவருக்கு சொந்தமான 3 ஏக்கர் நிலம் உள்ளது. அவரது நிலத்தின் அருகில் உள்ள மயானத்தின் ஒரு பகுதியையும் அவர் ஆக்கிரமித்துள்ளார். மேலும் தனது தோட்டத்தின் அருகில் இறந்தவரின் சடலத்தை அடக்கம் செய்யக்கூடாது என கூறியதால் இரு தரப்பினர் இடையே வாக்குவாதம் ஏற்பட்டது. இதுகுறித்து தகவலறிந்த ஆத்தூர் ஊரக இன்ஸ்பெக்டர் பூர்ணிமா, சதாசிவபுரம் விஏஓ கார்த்திக், தலைவாசல் ஊராட்சி ஒன்றிய அலுவலர் ஆகியோர் சம்பவ இடத்திற்கு சென்று, இருதரப்பையும் அழைத்து பேசினர். மயானத்தில் அடக்கம் செய்வதை தடுக்க கூடாது. லோகநாதனிடம் உள்ள ஆவணங்களை சமர்ப்பித்து நீதிமன்றம் மூலம் தீர்வு காண வேண்டுமென தெரிவித்தார். அதன்பின்னர் இறந்தவரின் சடலம் அடக்கம் செய்யப்பட்டது. இதனால் அப்பகுதியில் சிறிதுநேரம் பரபரப்பு ஏற்பட்டது.