மண்டபம் கடற்கரை பூங்காவில் குவிந்த சுற்றுலாப்பயணிகள்

மண்டபம், டிச.1: மண்டபம் கடற்கரை பூங்காவில் 15 நாட்களுக்குப் பின்பு சுற்றுலா பயணிகள் நேற்று ஞாயிற்றுக்கிழமை குவிந்தனர். ராமநாதபுரம் மாவட்டம் மண்டபம் மூன்று பக்கமும் கடலால் சூழ்ந்த ஒரு பகுதியாகும். இதனால் நவம்பர் 15ம் தேதி முதல் வங்கக்கடலில் ஏற்பட்ட சுழற்சி காற்றானது மண்டபம் கடலோரப் பகுதியில் தாக்கத்தை ஏற்படுத்தியது. இந்த 15 நாட்களில் ஒரு சில நாட்கள் கடுமையான கனமழையும் பெய்து சூறாவளி காற்று வீசியது. இதனால் மண்டபம் பேரூராட்சிக்கு உட்பட்ட தென்கடலோரப் பகுதியில் அமைந்துள்ள கடற்கரை பூங்காவில் சுற்றுலா பயணிகள் வருகை முற்றிலும் குறைந்தது.

இதனால் பூங்கா சில நாட்கள் வெறிச்சோடி காணப்பட்டது. இந்த நிலையில் மண்டபத்தில் சில நாட்களுக்கு பின்பு சூரிய ஒளி நேற்று காணப்பட்டு இயல்பு நிலைக்கு திரும்பியுள்ளது. இதனால் நேற்று ராமேஸ்வரத்திற்கு வருகை தந்த சுற்றுலாப் பயணிகள் மற்றும் பக்தர்கள் மண்டபம் கடற்கரை பூங்கா வளாகத்தில் நிறுத்தி அங்குள்ள சறுக்குகள், ஊஞ்சல்களில் விளையாடி மகிழ்ந்தனர். இதனால் கடற்கரை பூங்கா சுற்றுலாப்பணிகளின் வருகையால் நிரம்பி காட்சியளித்தது.