ஆயுத பூஜையை முன்னிட்டு கோயம்பேடு மார்க்கெட்டில் சிறப்பு சந்தை தொடங்கியது

போரூர், செப்.27: ஆயுத பூஜையை முன்னிட்டு கோயம்பேட்டில் சிறப்பு சந்தை நேற்று தொடங்கியது. அக்டோபர் 5ம் தேதி வரை இந்த சந்தை நடக்கிறது. இதில் பொறி, கடலை, வாழைப்பழம், வாழை இலை, தேங்காய், பழங்கள் உள்ளிட்ட பூஜை பொருட்களை விற்பனை செய்ய தனியாக ஒரு இடம் ஒதுக்கப்பட்டுள்ளது. அந்த இடத்தில் பொருட்களை விற்பனை செய்து கொள்ளலாம் எனவும், வியாபாரிகளுக்கு குறைகள் இருந்தால் நிவர்த்தி செய்து தரப்படும் எனவும் அங்காடி நிர்வாகம் அறிவித்துள்ளது. இங்கு பெண்களுக்கு தனி கழிவறை மற்றும் வியாபாரிகளுக்கு குடிநீர் உள்ளிட்ட சிறப்பு ஏற்பாடு செய்யப்பட்டுள்ளது.

இதுகுறித்து கோயம்பேடு பூ மார்க்கெட் துணை தலைவர் முத்துராஜ் கூறுகையில், ‘ஆயுத பூஜையை முன்னிட்டு சிறப்பு சந்தைக்கு ஏற்பாடு செய்து அதற்கான இடம் ஒதுக்கப்பட்டுள்ளது. கடந்தாண்டு சிறப்பு சந்தைக்கு ஒதுக்கப்பட்ட இடத்தில் வியாபாரம் செய்யாமல் கோயம்பேடு பூ மார்க்கெட்டில் பொறி, கடலை போன்ற பொருட்களை விற்பனை செய்ததால் மொத்த வியாபாரிகளுக்கு நஷ்டம் ஏற்பட்டது. இந்த ஆண்டும் இதுபோல் நடக்காதவாறு அங்காடி நிர்வாகம் நடவடிக்கை எடுக்க வேண்டும். மக்கள் கூட்டத்தை கட்டுப்படுத்த, கண்காணிக்க சிறப்பு அதிகாரிகளை அங்காடி நிர்வாகம் நியமிக்க வேண்டும். கோயம்பேடு பூ மார்க்கெட் வளாகத்தில் ஆக்கிரமித்து வியாபாரம் செய்தால் கடும் நடவடிக்கை எடுக்க வேண்டும்,’ என்றார்.