காஞ்சிபுரம் மாவட்டத்தில் 14ம் தேதி முதல் ஜமாபந்தி தொடக்கம்: கலெக்டர் தகவல்

காஞ்சிபுரம், ஜூன் 7: காஞ்சிபுரம் மாவட்டத்தில் உள்ள அனைத்து வட்டங்களிலும் 14ம்தேதி முதல் ஜமாபந்தி தொடங்குகிறது என்று மாவட்ட கலெக்டர் கலைச்செல்வி மோகன் தெரிவித்துள்ளார். காஞ்சிபுரம் மாவட்ட கலெக்டர் கலைச்செல்வி மோகன் வெளியிட்டுள்ள செய்தி குறிப்பில் கூறியிருப்பதாவது: காஞ்சிபுரம் மாவட்டத்தில் உள்ள அனைத்து வட்டங்களிலும் 1433ம் பசலி ஆண்டுக்கு வருவாய் தீர்வாயம் நடத்திடவும், கிராம கணக்குகளை தணிக்கை செய்திடவும் கீழ்கண்டவாறு வருவாய் தீர்வாய அலுவலர்கள் நியமனம் செய்து, மாவட்ட கலெக்டரால் உத்தரவிடப்பட்டுள்ளது.

அதன்படி, வாலாஜாபாத் வட்டத்தில், மாவட்ட கலெக்டர் கலைச்செல்வி தலைமையில், 14ம்தேதி மற்றும் 18ம்தேதி முதல் 21ம்தேதி வரை என 5 நாட்கள் நடைபெறும். குன்றத்தூர் வட்டத்தில், காஞ்சிபுரம் மாவட்ட வருவாய் அலுவலர் தலைமையில் 14ம்தேதி, 18ம்தேதி முதல் 21ம்தேதி வரை மற்றும் 25ம்தேதி என 6 நாட்கள் நடைபெறும்.காஞ்சிபுரம் வட்டத்தில், காஞ்சிபுரம் வருவாய் கோட்டாட்சியர் தலைமையில் 14ம்தேதி, 18ம்தேதி முதல் 21ம்தேதி வரை மற்றும் 25ம்தேதி என 6 நாட்கள் நடைபெறும். பெரும்புதூர் வட்டத்தில் பெரும்புதூர் வருவாய் கோட்டாட்சியர் 14ம்தேதி மற்றும் 18ம்தேதி முதல் 21ம்தேதி வரை என 5 நாட்கள் நடைபெறும். உத்திரமேரூர் வட்டத்தில், காஞ்சிபுரம் மாவட்ட வழங்கல் மற்றும் நுகர்வோர் பாதுகாப்பு அலுவலர் தலைமையில் 14ம்தேதி, 18ம்தேதி முதல் 21ம்தேதி மற்றும் 25ம்தேதி முதல் 27ம்தேதி வரை என 8 நாட்கள் நடைபெறும்.

மேலும், சம்பந்தப்பட்ட வட்டாட்சியரிடம் முன்னதாகவே பொதுமக்கள் தங்களது குறைகளை மனுக்கள் மூலம் தெரிவிக்கலாம். அவ்வாறு பெறப்பட்ட மனுக்கள் மீது, வருவாய் தீர்வாய மனு என குறிப்பிட்டு உரிய நடவடிக்கை மேற்கொள்ள ஏதுவாகவும், முன்கூட்டியே கள ஆய்வு ஏதும் தேவைப்படின் அதனை மேற்கொண்டு, வருவாய் தீர்வாய அலுவலருக்கு அறிக்கை அளிக்கவும் அறிவுறுத்தப்பட்டுள்ளது. எனவே, வரும் 14ம்தேதி முதல் 27ம்தேதி வரை தீர்வாய நிகழ்ச்சியினை பொதுமக்கள் நல்ல முறையில் பயன்படுத்திக்கொண்டு பயன்பெறலாம். இவ்வாறு அவர் தெரிவித்துள்ளார்.