திண்டுக்கல் கலெக்டர் அலுவலகத்தில் நலத்திட்ட உதவிகள் வழங்கல்

திண்டுக்கல், நவ. 18: திண்டுக்கல் கலெக்டர் அலுவலகத்தில் மக்கள் குறைதீர்க்கும் நாள் கூட்டம் நேற்று நடைபெற்றது. கலெக்டர் சரவணன் தலைமை வகித்து, பொதுமக்களிடமிருந்து 284 மனுக்களை பெற்றார். அந்த மனுக்கள் மீது உடனடியாக நடவடிக்கை எடுக்க வேண்டுமென அதிகாரிகளுக்கு உத்தரவிட்டார். தொடர்ந்து, பிரதம மந்திரி மீன்வள மேம்பாட்டுத் திட்டத்தின் கீழ் செயல்படுத்தப்பட்டு வரும் நடுத்தர அளவிலான அலங்கார மீன் வளர்த்தல் திட்டத்தின் மூலம் ஒருவருக்கு ரூ.3,14,000 மதிப்பீட்டிலும், கொல்லைப்புற அலங்கார மீன் வளர்த்தல் திட்டத்தின் மூலம் 2 பேருக்கு தலா ரூ.1,20,000 மதிப்பீட்டில் மொத்தம் ரூ.2,40,000 மதிப்பீட்டிலும், புதிய மீன் வளர்ப்புப் பண்ணை அமைத்தல் மற்றும் உள்ளீட்டு மானியம் வழங்கும் திட்டத்தின் மூலம் ஒருவருக்கு ரூ.1,10,000 மதிப்பீட்டில் என மொத்தம் 4 பேருக்கு ரூ.6,64,000 மதிப்பீட்டிலான மானியத் தொகை,

சமூகப் பாதுகாப்புத் திட்டத்தின் வாயிலாக செயல்பட்டு வரும் தமிழ்நாடு கட்டுமானத் தொழிலாளர்கள் நலவாரியம் மூலம் 2 பேருக்கு ரூ.4,10,000 மதிப்பீட்டில் விபத்து மரணம் ஈமச்சடங்கு உதவித் தொகை, 5 பேருக்கு ரூ.2,65,000 மதிப்பீட்டில் இயற்கை மரணம் ஈமச்சடங்கு உதவித் தொகையினையும் மற்றும் 14 பேருக்கு ரூ.2.80 லட்சம் மதிப்பீட்டில் திருமண உதவித்தொகை, தாட்கோ மூலம் ஒருவருக்கு ரூ.3,25,000 மதிப்பீட்டில் ஆட்டோ நலத்திட்ட உதவித் தொகையை கலெக்டர் சரவணன் வழங்கினார். கூட்டத்தில், டி.ஆர்.ஓ., ஜெயபாரதி, துணை ஆட்சியர் பயிற்சி ராஜேஸ்வரி சுவி, கலெக்டரின் நேர்முக உதவியாளர்கள் கீர்த்தனா மணி, செல்வன், தொழிலாளர் நலவாரிய உதவி ஆணையர் ராஜ்குமார் உட்பட பலர் கலந்து கொண்டனர்.