சைதாப்பேட்டை ஆலந்தூர் மேம்பாலத்தில் பைக்கில் சென்ற தந்தை, மகன் பலி

ஆலந்தூர், டிச.1: சைதாப்பேட்டை -ஆலந்தூர் ரோடு மேம்பாலத்தில் அடையாளம் தெரியாத வாகனம் மோதியதில் பைக்கில் சென்ற தந்தை, மகன் பரிதாபமாக உயிரிழந்தனர். சென்னை சைதாப்பேட்டை அருளாளன் பேட்டை கலைஞர் பல்நோக்கு மருத்துவமனை அருகே டிபன் கடை நடத்தி வருபவர் ரவி (50). இவருக்கு திருமணம் ஆகி 3 மகன்கள் உள்ளனர். ந்நிலையில் நேற்று முன்தினம் இரவு சைதாப்பேட்டை மார்க்கெட்டில் காய்கறி மற்றும் மளிகை பொருட்கள் வாங்குவதற்காக தனது இளைய மகன் கார்த்திக் (15) என்பவரை பைக்கில் அழைத்து சென்றார். அப்போது மழை விட்டுவிட்டு பெய்து கொண்டிருந்தது.

சைதாப்பேட்டை- ஆலந்தூர் ரோடு கல்லாற்று மேம்பாலத்தில் பைக் சென்றபோது, அந்த வழியாக வந்த அடையாளம் தெரியாத வாகனம் பைக் மீது மோதி விட்டு நிற்காமல் சென்று விட்டது. இதில் தந்தை, மகன் இருவரும் வாகனத்தின் சக்கரத்தில் சிக்கி பரிதாபமாக சம்பவ இடத்திலேயே உயிரிழந்தனர். இதையடுத்து அந்த வழியாக சென்றவர்கள் கிண்டி போக்குவரத்து போலீசாருக்கு தகவல் தெரிவித்தனர். சம்பவ இடத்திற்கு சென்ற கிண்டி போக்குவரத்து புலனாய்வு போலீசார் இருவரின் சடலங்களையும் மீட்டு பிரேத பரிசோதனைக்காக ராயப்பேட்டை அரசு மருத்துவமனைக்கு அனுப்பி வைத்தனர். மேலும், விபத்துக்கு காரணமான அடையாளம் தெரியாத வாகனத்தை அங்குள்ள சிசிடிவி கேமரா மூலம் போலீசார் தேடி வருகின்றனர்.