புனே: கடந்த 1999ம் ஆண்டு காங்கிரஸ் கட்சியில் இருந்து பிரிந்து தேசியவாத காங்கிரஸ் கட்சியை சரத் பவார் தொடங்கினார். கடந்த ஜூலை மாதம் சரத் பவாரின் அண்ணன் மகன் அஜித் பவார் 8 எம்.எல்.ஏக்களுடன் பிரிந்து சென்று பாஜ கூட்டணியில் சேர்ந்து துணை முதல்வர் ஆகிவிட்டார். இதனை தொடர்ந்து தேசியவாத காங்கிரஸ் கட்சி அஜித் பவார் அணி என்றும் சரத் பவார் அணி என்றும் இரண்டாக பிரிந்தது. தேர்தல் ஆணையம் அஜித் பவார் அணியை உண்மையான தேசியவாத காங்கிரஸ் கட்சி என்று அறிவித்து கட்சியின் பெயரையும் சின்னத்தையும் அந்த அணிக்கே வழங்கியது. சரத் பவார் அணி சரத்சந்திர பவார் தேசியவாத காங்கிரஸ் என்ற பெயரில் இயங்கவும் தேர்தல் ஆணையம் அனுமதி அளித்துள்ளது. பவார் அணி காங்கிரசுடன் இணைக்கப்படும் என்று செய்திகள் வெளியாகின. ஆனால் சரச்சந்திர பவார் தேசியவாத காங்கிரஸ் கட்சி எந்த கட்சியுடனும் இணையாது என்று சுப்ரியா சுலே நேற்று தெரிவித்தார்.