ரஷித் கான் சுழலில் மூழ்கியது அயர்லாந்து

ஷார்ஜா: அயர்லாந்து அணியுடனான 2வது டி20 போட்டியில், ஆப்கானிஸ்தான் அணி 10 ரன் வித்தியாசத்தில் போராடி வென்றது. ஷார்ஜா கிரிக்கெட் அரங்கில் நேற்று முன்தினம் இரவு நடந்த இப்போட்டியில், டாஸ் வென்று பேட் செய்த ஆப்கானிஸ்தான் 3.4 ஓவரில் 14 ரன்னுக்கு 4 விக்கெட் இழந்து திணறியது. பின்னர் சுதாரித்து விளையாடிய அந்த அணி 20 ஓவரில் 9 விக்கெட் இழப்புக்கு 152 ரன் குவித்தது.

செதிக்குல்லா அடல் 35, முகமது நபி 59 ரன் (38 பந்து, 6 பவுண்டரி, 3 சிக்சர்), கேப்டன் ரஷித் கான் 25 ரன் (12 பந்து, 3 பவுண்டரி, 1 சிக்சர்) விளாசினர். அயர்லாந்து பந்துவீச்சில் மார்க் அடேர் 3, ஜோஷ் லிட்டில், மெக்கார்தி தலா 2, பென் ஒயிட் 1 விக்கெட் வீழ்த்தினர். அடுத்து 20 ஓவரில் 153 ரன் எடுத்தால் வெற்றி என்ற இலக்குடன் களமிறங்கிய அயர்லாந்து, 20 ஓவரில் 8 விக்கெட் இழப்புக்கு 142 ரன் மட்டுமே எடுத்து 10 ரன் வித்தியாசத்தில் தோல்வியைத் தழுவியது.

தொடக்க வீரர்கள் பால்பிர்னி 45, கேப்டன் பால் ஸ்டர்லிங் 24 ரன் மற்றும் கேரத் டெலனி 39 ரன் (18 பந்து, 3 பவுண்டரி, 4 சிக்சர்) விளாச, மற்ற வீரர்கள் சொற்ப ரன்னில் அணிவகுத்தனர். ஆப்கான் பந்துவீச்சில் ரஷித் கான் 4 ஓவரில் 14 ரன் மட்டுமே விட்டுக்கொடுத்து 4 விக்கெட் கைப்பற்றினார். நங்கேயலியா கரோட்டே 2, முகமது நபி, பஸல்லாக் பரூக்கி தலா 1 விக்கெட் வீழ்த்தினர். ஆல் ரவுண்டராக அசத்திய ரஷித் கான் ஆட்ட நாயகன் விருது பெற்றார்.