Tuesday, April 16, 2024
Home » வெஸ்ட் இண்டீஸ் ஆறுதல் வெற்றி: ரஸ்ஸல் அதிரடி ஆட்டம்

வெஸ்ட் இண்டீஸ் ஆறுதல் வெற்றி: ரஸ்ஸல் அதிரடி ஆட்டம்

by Suresh

பெர்த்: ஆஸ்திரேலிய அணியுடனான 3வது மற்றும் கடைசி டி20 போட்டியில், வெஸ்ட் இண்டீஸ் 37 ரன் வித்தியாசத்தில் ஆறுதல் வெற்றி பெற்றது. ஆஸ்திரேலியா 2-1 என்ற கணக்கில் தொடரை கைப்பற்றியது. பெர்த் ஸ்டேடியத்தில் நேற்று நடந்த இப்போட்டியில், டாஸ் வென்று பேட் செய்த வெஸ்ட் இண்டீஸ் 8.4 ஓவரில் 79 ரன்னுக்கு 5 விக்கெட் இழந்து தடுமாறியது. ஜான்சன் சார்லஸ் 4, நிகோலஸ் பூரன் 1, கைல் மேயர்ஸ் 11, ரோஸ்டன் சேஸ் 37, கேப்டன் பாவெல் 21 ரன் எடுத்து ஆட்டமிழந்தனர். இந்த நிலையில், ஷெர்பேன் ரூதர்போர்டு – ஆந்த்ரே ரஸ்ஸல் ஜோடி 6வது விக்கெட்டுக்கு அதிரடியாக விளையாடி 139 ரன் சேர்த்து சாதனை படைத்தது.

ரூதர்போர்டு 33 பந்திலும், ரஸ்ஸல் 25 பந்திலும் அரை சதம் அடித்து அசத்தினர். ஆடம் ஸம்பா வீசிய 19வது ஓவரில் ரஸ்ஸல் 4 சிக்சர், 1 பவுண்டரி விளாசியது குறிப்பிடத்தக்கது. ரஸ்ஸல் 71 ரன் (29 பந்து, 4 பவுண்டரி, 7 சிக்சர்) விளாசி ஸ்பென்சர் ஜான்சன் பந்துவீச்சில் மேக்ஸ்வெல் வசம் பிடிபட்டார். வெஸ்ட் இண்டீஸ் 20 ஓவரில் 6 விக்கெட் இழப்புக்கு 220 ரன் குவித்தது. ரூதர்போர்டு 67 ரன் (40 பந்து, 5 பவுண்டரி, 5 சிக்சர்), ரொமாரியோ 2 ரன்னுடன் ஆட்டமிழக்காமல் இருந்தனர். ஆஸி. பந்துவீச்சில் ஜேவியர் பார்ட்லெட் 2, பெஹரண்டார்ப், ஸ்பென்சர், ஹார்டி, ஸம்பா தலா 1 விக்கெட் வீழ்த்தினர்.

அடுத்து களமிறங்கிய ஆஸ்திரேலியா 20 ஓவரில் 5 விக்கெட் இழப்புக்கு 183 ரன் மட்டுமே எடுத்து, 37 ரன் வித்தியாசத்தில் தோல்வியைத் தழுவியது. வார்னர் 81 ரன் (49 பந்து, 9 பவுண்டரி, 3 சிக்சர்) விளாச, கேப்டன் மார்ஷ் 17, ஹார்டி 16, இங்லிஸ் 1, மேக்ஸ்வெல் 12 ரன்னில் விக்கெட்டை பறிகொடுத்தனர். டிம் டேவிட் 41 ரன் (19 பந்து, 2 பவுண்டரி, 4 சிக்சர்), மேத்யூ வேடு 7 ரன்னுடன் ஆட்டமிழக்காமல் இருந்தனர். வெஸ்ட் இண்டீஸ் பந்துவீச்சில் ரொமாரியோ, சேஸ் தலா 2, அகீல் உசேன் 1 விக்கெட் வீழ்த்தினர். ஆஸ்திரேலியா 2-1 என்ற கணக்கில் தொடரை கைப்பற்றியது. ரஸ்ஸல் ஆட்ட நாயகன் விருதும், வார்னர் தொடர் நாயகன் விருதும் பெற்றனர்.

You may also like

Leave a Comment

nine + 2 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2023 – Designed and Developed by Sortd.Mobi