Suresh

சென்னை: திமுக மாநிலங்களவை உறுப்பினர் பி.வில்சன், தனது சமூக வலைதளப் பதிவில் வெளியிட்ட அறிக்கையில், ஆர்எஸ்எஸ் சித்தாந்தத்தால் இயக்கப்படும் பிரதமர் மோடி தலைமையிலான மத்திய பாஜ அரசு, கீழடியின் முக்கியத்துவத்தை புதைத்துவிட தீர்மானித்தது போல் தோன்றுகிறது. ஜனவரி 2023ல் தொல்லியல் ஆய்வாளர் அமர்நாத் ராமகிருஷ்ணன் கீழடி அகழாய்வு குறித்து விரிவான இறுதி அறிக்கையை சமர்ப்பித்தார். இருப்பினும், இந்த அறிக்கை தற்போது வரை பொதுவெளியில் வெளியிடப்படவில்லை.

ஏனெனில், அந்த அறிக்கை ஆர்.எஸ்.எஸ். சித்தாந்தத்தால் இயக்கப்படும் மத்திய பாஜ அரசினால் புனையப்பட்ட கட்டுக்கதைகளை தோலுரிக்கிறது. இதற்காக கீழடி தொடர்பான அறிவியல் ஆய்வுகளுக்கு நேரம் தேவைப்படுவதால் தாமதமாகிறது என்று கூறி வருகிறது.

ஒன்றிய அரசு உண்மையாகவே கூட்டாட்சி முறையை மதிக்கிறதானால், கீழடி இந்தியாவின் பெருமையாகக் கொண்டாடப்பட வேண்டும். ஆனால், அதற்கு பதிலாக, சமஸ்கிருதம் தெற்கே வருவதற்கு முன்பே தமிழ் நிலப்பரப்பில் எழுத்து, தொழில் மற்றும் வளமான கலாசாரம் இருந்ததை கீழடி நிரூபிப்பதால், அவர்கள் அதைத் தடுத்து, தாமதப்படுத்தி, கேள்விக்குள்ளாக்குகின்றனர். இந்த தாமதம் தற்செயலானது அல்ல என்று வில்சன் குறிப்பிட்டுள்ளார்.

சென்னை: சமத்துவ மக்கள் கழக தலைவ்ர எர்ணாவூர் நாராயணன் இன்று வெளியிட்டுள்ள அறிக்கையில் கூறியிருப்பதாவது: தூத்துக்குடி மாவட்டம் சாத்தான்குளம் அருகே உள்ள பெரிய தாழையில் நாம் தமிழர் கட்சியின் உழவர் பாசறை சார்பில் கள் தடையை நீக்க வலியுறுத்தி பனைமரத்திலிருந்து கள் இறக்கிய போராட்டம் நேற்று நடைபெற்றது. இதில் கட்சியின் தலைமை ஒருங்கிணைப்பாளர் சீமான் கலந்து கொண்டு பனை மரத்தில் ஏறி கள் இறக்கி அதனை பொதுமக்களுக்கும் நிர்வாகிகளுக்கும் ஊற்றி கொடுத்துள்ளார்.

கடந்த ஆண்டு பனைமரத் தொழிலாளர்கள் வாரியம் சார்பாக ஒரு கோடி பனை விதைகள் விதைத்து உலக சாதனை பட்டியலில் இடம் பெற்றுள்ளோம். அதன் பிறகு இன்று தமிழக அரசு பனைத் தொழிலாளர்கள் நலனுக்காக பல்வேறு திட்டங்கள் அறிவித்து அவர்கள் பயனடைந்து வருகிறார்கள். தேர்தல் நெருங்கும் சமயம் சீமான் அரசியல் ஆதாரம் தேடுகிறார்.

அதிமுக ஆட்சியில் 10 ஆண்டுகளாக பனைமர தொழிலாளர்கள் நலனுக்காக அரசு எவ்வித நடவடிக்கையும் மேற்கொள்ளாத நிலையில் திமுக அரசு பொறுப்பேற்றவுடன் மீண்டும் பனை நல வாரியம் அமைத்து பனைத் தொழிலாளர்கள் பாதுகாவலராக தமிழக அரசு இன்று திகழ்ந்து வருகிறது என்பதை தெரிவித்துக் கொள்கிறேன். இவ்வாறு அவர் கூறியுள்ளார்.

தேனி: தேனி கலெக்டர் அலுவலகத்தில் துணை முதல்வர் உதயநிதி ஸ்டாலின் தலைமையில் அனைத்து துறை ஆய்வுக் கூட்டம் நடைபெற்றது. தேனி, சிவகங்கை மாவட்ட அரசு நிகழ்ச்சிகளில் பங்கேற்பதற்காக துணை முதல்வர் உதயநிதி ஸ்டாலின் சென்னையில் இருந்து விமானம் மூலம் நேற்றிரவு மதுரை வந்தார். விமான நிலையத்தில் உற்சாக வரவேற்பு அளிக்கப்பட்டது. பின்னர் அங்கிருந்து காரில் புறப்பட்டு இரவு தேனி வந்தடைந்தார்.

தேனியில் உள்ள தனியார் விடுதியில் தங்கிய துணை முதலமைச்சர் இன்று காலை 10 மணியளவில் தேனி மாவட்ட கலெக்டர் அலுவலகத்தில் நடந்த அனைத்துத் துறை அலுவலர்களுடனான ஆய்வுக் கூட்டத்தில் கலந்து கொண்டு, வளர்ச்சித் திட்டப்பணிகள் குறித்து ஆய்வு செய்தார். இதில் அனைத்து துறை அதிகாரிகள் கலந்து கொண்டனர். இதையடுத்து பயனாளிகளுக்கு அரசு நலத்திட்ட உதவிகளை வழங்கினார். பின்னர் தேனியில் பகல் 12.30 மணியளவில் நேரு சிலை அருகே துணை முதல்வருக்கு திமுகவினர் உற்சாக வரவேற்பு அளித்தனர்.

தொடர்ந்து தேனி அருகே மதுராபுரியில் உள்ள தனியார் திருமண மண்டபத்தில் தேனி ஒருங்கிணைந்த மாவட்ட திமுக சார்பு அணிகளின் நிர்வாகிகளுடன் தேர்தல் தொடர்பான கலந்துரையாடல் கூட்டத்தில் கலந்துரையாடினார். இதனையடுத்து, தேனி ஊராட்சி ஒன்றிய அலுவலக வளாகத்தில் அமைக்கப்பட்டுள்ள தேனி தொகுதி எம்.பி தங்கதமிழ்செல்வன் அலுவலக அறையை துணை முதலமைச்சர் திறந்து வைத்தார். மாலையில் 3 மணியளவில் தேனியில் உள்ள தனியார் ஓட்டலில் தேனி வடக்கு, தெற்கு மாவட்ட, ஒன்றிய, நகர, பேரூர் இளைஞர் அணி நிர்வாகிகளின் சந்திப்பு நடந்தது. மாலை 4.30 மணி வரை மாவட்ட இளைஞர் அணி துணை அமைப்பாளர் பொறுப்புக்கான நேர்காணல் நடைபெற்றது.

இன்றிரவு மதுரைக்கு காரில் திரும்பும் துணை முதலமைச்சர், மதுரை அழகர்கோவில் ரோட்டில் உள்ள ஓட்டலில் தங்குகிறார். நாளை 17ம் தேதி காலை காரில் சிவகங்கை செல்லும் அவர், அங்கு நடக்கும் நிகழ்ச்சிகளில் பங்கேற்று, நாளை இரவு மதுரை திரும்பி, இரவு 8 மணி விமானத்தில் சென்னைக்கு செல்கிறார்.

சென்னை: ஈரான் மீதான இஸ்ரேலின் தாக்குதலுக்கு முதலமைச்சரின் கண்டனம் வரவேற்கத்தக்கது என மனிதநேய மக்கள் கட்சியின் தலைவர் ஜவாஹிருல்லா தெரிவித்துள்ளார். “இந்திய மக்களின் நிலைப்பாட்டைப் பிரதிபலிக்கும் வகையில் முதல்வரின் அறிக்கை இருந்தது. ஈரான் மீதான இஸ்ரேலின் தாக்குதல் குறித்து மோடி அரசுக்கு கண்டிக்க மனமில்லை” எனவும் தெரிவித்துள்ளார்.

மேலும் அவர் வெளியிட்டுள்ள அறிக்கையில்; ” பாலஸ்தீனத்தின் காசா பகுதியில் அப்பாவி பொதுமக்கள் மீது ஏவுகணைகள் வீசி பல்லாயிரக்கணக்கான மக்களைக் கொன்று குவித்து வருகிறது இஸ்ரேல்.

ஐநா உள்ளிட்ட பல்வேறு நாடுகளும் இத்தத் தாக்குதலுக்குக் கண்டனம் தெரிவித்துள்ளதினை அந்நாடு பொருட்படுத்தவே இல்லை.

இத்தகைய சூழ்நிலையில் ஈரான் நாட்டின் மீது இஸ்ரேல் அணு ஆயுதக் குற்றச்சாட்டைச் சுமத்தித் தாக்குதல் நடத்தி இருக்கிறது. இஸ்ரேலின் இந்தச் செயல் கடும் கண்டனத்துக்குரியது. உலகத்தின் நாட்டாமையாகத் தன்னைத் தானே பாவித்துக் கொண்டு இது போன்ற கொடுஞ்செயலில் ஈடுபட்டு வருகிறது. தற்போது ஈரானும் பதிலடி கொடுத்துவரும் நிலையில் தேவையற்ற போர்ப் பதற்றம் உருவாகி இருக்கிறது.

ஐநா வகுத்துத் தந்துள்ள எந்த விதமான மனித உரிமை வழிகாட்டுதல்களையும் பின்பற்றுவது இல்லை. அப்பாவி பொதுமக்கள் மீதும் அண்டை நாடுகளின் மீதும் போர் வெறியோடு ஏவுகணை வீசி வரும் இஸ்ரேலுக்கு ஆதரவாக ஐ நா மன்றத்தில் மோடி அரசு எடுத்துள்ள நிலைப்பாடு வன்மையாகக் கண்டிக்கத்தக்கது இந்தியா.

ஐ நா பொதுச் சபையில் காஸாவில் உடனடி சண்டை நிறுத்தம் ஏற்பட வேண்டும் எ‌‌ன்ன தீர்மானத்திற்கு ஆதரவாக 149 நாடுகள் வாக்களித்தன. 19 நாடுகள் வாக்களிப்பைப் புறக்கணித்தன. இந்த 19 நாடுகளில் இந்தியாவும் ஒன்று என்பது மிகுந்த மனவேதனையை அளிக்கின்றது.

1974ல் உருவாக்கப்பட்ட யாசர் அரபாத் தலைமை வகித்த பாலஸ்தீன விடுதலை இயக்கத்தை(பிஎல்ஒ) அங்கீகரித்த முதல் அரபு அல்லாத நாடு இந்தியா என்ற பெருமையையும் 1988ல் பாலஸ்தீன நாடு என்ற கோட்பாட்டை அங்கீகரித்த சிறப்பையும் மோடி அரசு சிதைத்துள்ளது.

டிசம்பர் 2024ல் ஐ நா மன்றத்தில் சண்டை நிறுத்தம் குறித்த தீர்மானத்திற்கு ஆதரவாக வாக்களித்த மோடி அரசு தற்போது தனது நிலைப்பாட்டை மாற்றிக் கொண்டது ஏன்? மோடி ஆட்சியை ஆட்டுவிக்கும் ஆர்எஸ்எஸ் தலைவரின் கட்டளையினால் நிலைப்பாடு மாறியதா?

ஈரான் மீதான இஸ்ரேலின் தாக்குதல் குறித்து மோடி அரசு கண்டிக்க மனமில்லா சூழலில் ஈரான் மீது இஸ்ரேல் தொடுத்து வரும் தாக்குதல்கள் பெரும் போரை மூளச் செய்யும் பொறுப்பற்ற செயலாகும் என்றும் ஏற்கெனவே காசாவில் தொடர்ந்து குண்டுகளை வீசி, பாலஸ்தீன மக்கள் அல்லலுற்று வரும் வேளையில் இஸ்ரேலின் இந்த வன்முறைப்பாதை கண்டிக்கத்தக்கது் என்றும் தமிழ்நாடு முதலமைச்சர் மு க ஸ்டாலின் வெளியிட்டுள்ள அறிக்கையை வரவேற்கிறேன். அனைத்து இந்திய மக்களின் நிலைப்பாட்டைப் பிரதிபலிக்கும் வகையில் முதலமைச்சரின் வீரியமிக்க அறிக்கை அமைந்துள்ளதற்கு நெஞ்சார்ந்த நன்றி” என தெரிவித்துள்ளார்.