ஈரோடு: ஈரோட்டில் ஆசிரியர் தேர்வு வாரிய செயலாளரின் மாமனார் வீட்டில் லஞ்ச ஒழிப்பு பிரிவு போலீசார் மேற்கொண்ட சோதனையில் ரூ.88 லட்சம் மதிப்பிலான சொத்து ஆவணங்கள் பறிமுதல் செய்யப்பட்டுள்ளது. ஈரோடு மாவட்டம் கோபி அருகே உள்ள வெள்ளாங்கோயிலை சேர்ந்த ராமேஸ்வரம் முருகன் (55). இவர் தமிழ்நாடு பள்ளி கல்வித்துறை முன்னாள் இயக்குநரும், தற்போதைய ஆசிரியர் தேர்வு வாரிய செயலாளருமாக உள்ளார். இவர் தற்போது குடும்பத்துடன் சென்னையில் வசித்து வரும் நிலையில், வெள்ளாங்கோயிலில் உள்ள வீட்டில் அவரது பெற்றோர் சின்னசாமி, மங்கையர்கரசி ஆகியோர் வசித்து வருகின்றனர்.
ஆசிரியர் தேர்வு வாரிய செயலாளர் பதவி மற்றும் பள்ளி கல்வித்துறை இயக்குநராக இருந்தபோது முருகன் லஞ்சம் பெற்றதாக புகார் எழுந்தது. அதனடிப்படையில் ஈரோடு மாவட்ட லஞ்ச ஒழிப்பு இன்ஸ்பெக்டர் ரேகா தலைமையில் 6 பேர் கொண்ட லஞ்ச ஒழிப்பு போலீசார் நேற்று வெள்ளாங்கோயிலில் உள்ள ராமேஸ்வரம் முருகனின் பெற்றோர் வீட்டில் 12 மணி நேரம் சோதனையில் ஈடுபட்டனர். இதேபோல், ஈரோடு அக்ரஹார வீதியில் உள்ள நகைக்கடை உரிமையாளரான ராமேஸ்வரம் முருகனின் மாமனார் அறிவுடை நம்பி வீட்டிலும் லஞ்ச ஒழிப்பு பிரிவு போலீசார் அதிரடியாக நுழைந்து சோதனை நடத்தினர்.
இந்த சோதனை நேற்று மாலை 5 மணிக்கு நிறைவடைந்தது. இந்த சோதனை குறித்து ஈரோடு லஞ்ச ஒழிப்பு பிரிவு இன்ஸ்பெக்டர் ரேகா கூறுகையில், ‘‘அக்ரஹார வீதியில் அறிவுடை நம்பி வீட்டில் நடந்த சோதனையில் ரூ.88 லட்சம் மதிப்பிலான சொத்து ஆவணங்களை கைப்பற்றியுள்ளோம். அதேபோல், கோபியில் ராமேஸ்வரம் முருகன் பெற்றோர் வீட்டில் நடந்த சோதனையில் 2 வங்கி லாக்கர் சாவிகளை கைப்பற்றியுள்ளோம். அந்த வங்கி லாக்கரில் உயர் அதிகாரிகளின் அனுமதியோடு சோதனை மேற்கொள்ள உள்ளோம்’’ என்றார்.
