சென்னை: தி.மு.க. உடனான தொகுதி பங்கீடு பேச்சுவார்த்தை சுமுகமாக இருந்தது என்று ம.தி.மு.க. அவைத்தலைவர் கூறினார். நாடாளுமன்ற தேர்தல் தொடர்பான தி.மு.க.-ம.தி.மு.க. இடையேயான தொகுதி பங்கீடு குறித்த முதற்கட்ட பேச்சுவார்த்தை அண்ணா அறிவாலயத்தில் இன்று நடைபெற்றது. தி.மு.க. பொருளாளர் டி.ஆர்.பாலு தலைமையிலான பேச்சுவார்த்தை குழுவினருடன் ம.தி.மு.க. தேர்தல் குழுவினர் பேச்சுவார்த்தை நடத்தினர்.
அப்போது திருச்சி, விருதுநகர், காஞ்சிபுரம், கடலூர், ஈரோடு, மயிலாடுதுறை ஆகிய 6 தொகுதிகள் அடங்கிய விருப்ப பட்டியலை ம.தி.மு.க. வழங்கியுள்ளதாக கூறப்படுகிறது. கடந்த முறை திமுக கூட்டணியில் ஈரோடு மக்களவை தொகுதி மற்றும் ஒரு மாநிலங்களவை எம்.பி. இடம் ம.தி.மு.க.வுக்கு ஒதுக்கப்பட்டிருந்தது.
தி.மு.க. உடனான தொகுதி பங்கீடு பேச்சுவார்த்தை சுமுகமாக இருந்தது. 2 மக்களவைத் தொகுதிகள், ஒரு மாநிலங்களவை இடம் ஒதுக்க தி.மு.க.விடம் கேட்டுள்ளோம். மக்களவைத் தேர்தலில் எங்கள் கட்சி சின்னத்தில்தான் கண்டிப்பாக போட்டியிடுவோம். ம.தி.மு.க. சின்னத்தில் போட்டியிட வேண்டுமென்பதுதான் கட்சி நிலைப்பாடு; இதுகுறித்து தி.மு.க. குழுவிடம் கோரிக்கை வைத்துள்ளோம். இவ்வாறு அவர் கூறினார். காங்கிரஸ், சி.பி.ஐ., சி.பி.எம்., ம.தி.மு.க. உள்ளிட்ட கட்சிகளுடன் முதல்கட்ட பேச்சுவார்த்தையை தி.மு.க. நிறைவு செய்துள்ளது.
