Monday, April 22, 2024
Home » வருமானத்தை குறைத்து கணக்கு காட்டியதாக சென்னையில் 10 இடங்களில் வருமான வரித்துறை சோதனை

வருமானத்தை குறைத்து கணக்கு காட்டியதாக சென்னையில் 10 இடங்களில் வருமான வரித்துறை சோதனை

by Mahaprabhu

சென்னை: வருமானத்தை குறைத்து கணக்கு காட்டியதாக சென்னையில் பிரபல கட்டுமான நிறுவனம் மற்றும் கல்வி நிறுவனங்களுக்கு சொந்தமான 10 இடங்களில் வருமான வரித்துறை அதிகாரிகள் சோதனை நடத்தி வருகின்றனர். சென்னை டிடிகே.சாலையில் பிரபல கட்டுமான நிறுவனம் இயங்கி வருகிறது. இந்த நிறுவனம் பெங்களூரு மற்றும் தமிழ்நாடு முழுவதும் தனது கட்டுமான பணிகளை செய்து வருகிறது. இந்த நிறுவனம் கடந்த 2021-22ம் நிதியாண்டில் முறையாக வருமான வரித்துறைக்கு கணக்கு காட்டாமல் இருந்ததாக கூறப்படுகிறது.

அதைதொடர்ந்து, கடந்த ஆண்டு வருமான வரித்துறை அதிகாரிகள் பிரபல கட்டுமான நிறுவனத்திற்கு சொந்தமான இடங்கள் மற்றும் பங்குதாரர்களாக உள்ள கல்வி நிறுவன அதிபருக்கு சொந்தமான இடங்களில் சோதனை நடத்தியது. இந்த சோதனையில் பல முக்கிய ஆவணங்கள் சிக்கியதாக கூறப்படுகிறது. அதனை தொடர்ந்து, மீண்டும் இரண்டாவது முறையாக சென்னை டிடிகே சாலையில் உள்ள பிரபல கட்டுமான நிறுவனம் மற்றும் அதன் பங்குதாரர்களாக உள்ள கல்வி நிறுவனத்திற்கு சொந்தமான 10 இடங்களில் இன்று காலை முதல் வருமான வரித்துறை அதிகாரிகள் துணை ராணுவ வீரர்கள் உதவியுடன் சோதனை நடத்தி வருகின்றனர். குறிப்பாக சென்னை டிடிகே.சாலையில் உள்ள கட்டுமான நிறுவனத்தின் தலைமை அலுவலகத்திற்கு இன்று காலை 4 கார்களில் வந்து வருமான வரித்துறை அதிகாரிகள் சோதனை நடத்தி வருகின்றனர்.

அதேபோல், கட்டுமான நிறுவனத்தின் கிளை அலுவலகங்களான நீலாங்கரையில் உள்ள பாலா இல்லம், அண்ணாநகர், எழும்பூர், அடையாறு பகுதிகளில் உள்ள அலுவலகங்களிலும் சோதனை நடந்து வருகிறது. மேலும், அதன் பங்குதாரர்களாக உள்ள பிரபல கல்வி நிறுவனத்தின் சென்னை நந்தனத்தில் உள்ள அலுவலகம், தரமணியில் உள்ள ஐடி நிறுவனம் மற்றும் அதன் நிர்வாகிகள் வீடுகளில் சோதனை நடந்து வருகிறது. இந்த சோதனை முடிவில் தான் முழு விபரங்கள் தெரியவரும் என வருமான வரித்துறை அதிகாரிகள் தரப்பில் தெரிவிக்கப்பட்டுள்ளது.

You may also like

Leave a Comment

eighteen − 15 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2024-2025 – Designed and Developed by Sortd.Mobi