நியூயார்க்: உலகளவில் அதிகம் தங்கம் வைத்திருக்கும் முதல் 10 நாடுகளில் 9ம் இடத்தில் இருக்கும் இந்தியாவிடம் 800 டன் தங்கம் இருப்பு உள்ளது. அமெரிக்கா முதலிடத்திலும், சீனா ஆறாவது இடத்திலும் உள்ளது. ஒவ்ெவாரு நாட்டின் கடன் தகுதி மற்றும் ஒட்டுமொத்த பொருளாதார நிலையை நிர்ணயிப்பதில் தங்கம் முக்கிய பங்கு வகிக்கிறது. தங்கத்தின் இருப்பை அடிப்படையாக கொண்டே அந்த நாட்டின் பொருளாதார ஸ்திரத்தன்மையை நிர்ணயம் செய்ய முடியும். நெருக்கடியான காலங்களில் தங்கம் இருப்பு பொருளாதார நிலையை சீரமைக்க உதவுகிறது. அதனால் தான் உலகளாவிய பொருளாதார மந்தநிலை ஏற்பட்டாலும் கூட, தங்கத்தின் விலை அடிக்கடி உயர்ந்து கொண்டே செல்கிறது. வளர்ந்து வரும் பொருளாதார நிச்சயமற்ற தன்மை காரணமாக தற்போது பல நாடுகள் தங்க இருப்பை அதிகரித்து வருகின்றன.
அந்த நாடுகளின் தலைமை மற்றும் ரிசர்வ் வங்கிகள், தங்கத்தின் இருப்பை பாதுகாப்பான சொத்தாக கருதுகின்றன. மேற்கண்ட காரணங்கள் மட்டுமின்றி ஒவ்வொருவரின் நிலையான மற்றும் நம்பகமான சொத்தாக தங்கம் மதிப்பிடப்படுகிறது. வரலாற்று ரீதியாக ஒவ்வொரு நாட்டின் நாணயத்தின் மதிப்பை அதிகரிப்பதில் தங்கத்திற்கு முக்கிய பங்குள்ளது. அமெரிக்க டாலரின் விலை குறையும் போது, தங்கத்தின் விலை அதிகரிக்கிறது. தங்கத்தின் இருப்புக்கள் சர்வதேச வர்த்தகம் மற்றும் நிதியில் முக்கிய பங்கை வகிக்கின்றன. சில நாடுகள் வர்த்தக ஏற்றத்தாழ்வுகளைச் சமாளிக்க அல்லது கடன்களுக்கான பிணையமாக தங்கத்தைப் பயன்படுத்துகின்றன. தங்க இருப்பை அடிப்படையாக கொண்டே உலகளாவிய நிதி அமைப்பும் செயல்பட்டு வருகிறது. இந்நிலையில் அதிகளவில் தங்கம் இருப்பு வைத்திருக்கும் 10 நாடுகளின் பட்டியல் தற்போது வெளியாகி உள்ளது. ‘ஃபோர்ப்ஸ்’ நிறுவனம் வெளியிட்ட ஆய்வறிக்கையின்படி, உலகிலேயே அதிக தங்க இருப்புக்களை கொண்ட நாடாக அமெரிக்கா விளங்குகிறது.
அதாவது 8,1336.46 டன் தங்கம் அமெரிக்காவிடம் உள்ளது. ஜெர்மனி 3,352.65 டன் தங்க இருப்புடன் இரண்டாவது இடத்தில் உள்ளது. இத்தாலி 2,451.84 டன் தங்க இருப்புடன் மூன்றாவது இடத்தில் உள்ளது. நான்காவது இடத்தில் உள்ள பிரான்ஸ் 2,436.88 டன் தங்க இருப்பைக் கொண்டுள்ளது. ரஷ்யா 2,332.74 டன் தங்க இருப்புடன் ஐந்தாவது இடத்தில் உள்ளது. அதிக நடுத்தர வருவாய் கொண்ட நாடான சீனாவிடம் 2,191.53 டன் தங்கம் இருப்பு உள்ளது. ஆறாவது இடத்தில் சீனா உள்ள நிலையில், ஏழாவது இடத்தில் இருக்கும் சுவிட்சர்லாந்திடம் 1,040.00 டன் தங்க இருப்பு உள்ளது. எட்டாவது இடத்தில் உள்ள ஜப்பானிடம் 845.97 டன் தங்க இருப்பு உள்ளது. 800.78 டன் இருப்பு தங்கத்துடன் இந்தியா ஒன்பதாவது இடத்தில் உள்ளது. 10வது இடத்தில் உள்ள நெதர்லாந்து 612.45 டன் தங்க இருப்பை கொண்டுள்ளது.
